Karlakór og fíflagangur hin fullkomna blanda

„Þetta hefur verið ævintýralegt og mjög skemmtilegur fíflagangur,“ segir Steinþór Þráinsson, kórstjóri þingeyska karlakórsins Hreims, en kórinn fagnar 40 ára afmæli sínu með tónleikum ásamt Ljótu hálfvitunum. „Við höldum alltaf stóra tónleika á vorin en í ár ákváðum við að gera eitthvað meira en venjulega til að halda almennilega upp á afmælið okkar. Úr því varð þessi skemmtilega blanda af klassíska karlakórnum og svo fíflaganginum í hálfvitunum,“ segir Steinþór.

Steinþór segir undirbúning hafa gengið gríðarlega vel, þrátt fyrir að það hafi verið fremur skiptar skoðanir á meðal meðlima kórsins í fyrstu. „Eftir að við hófum æfingar um áramótin voru allir sammála um að þetta yrði bara skemmtilegra með hverri æfingunni. Aldursforsetinn okkar sem er áttræður segist hreinlega aldrei hafa skemmt sér eins vel,“ segir Steinþór.

Kórinn og hljómsveitin héldu tónleika síðustu helgi fyrir norðan. „Þeir gengu mjög vel og salurinn var fullur, þrátt fyrir öskrandi stórhríð,“ segir Steinþór og telur að tónleikarnir í dag verði ekki síðri.

„Þessi blanda er svo skemmtileg og það hefur verið alveg ótrúlega gaman að vinna með þessum vitleysingum,“ segir Steinþór. Afmælistónleikarnir fara fram í Háskólabíói í dag klukkan 15 og munu Hreimur og Hálfvitarnir flytja tónlist sína á hefðbundinn hátt en vinna einnig saman. Hálfvitarnir hafa meðal annars útsett nokkur lög kórsins eftir sínu höfði og munu leika undir söng kórsins.

Einnig hafa nokkur lög hljómsveitarinnar fengið meðferð hjá kórnum og mun hann taka undir lögin. „Fyrri hluti tónleikanna verður klassískir karlakórstónleikar, en Ljótu hálfvitarnir koma inn rétt fyrir hlé og þá erum við strax farnir út af sporinu. Eftir hlé munum við síðan syngja með þeirra lögum og úr verða mjög frumlegir og skemmtilegir tónleikar,“ segir Steinþór.