Tæplega áttrætt Matador fannst á vergangi í Neskaupstað

Inn á borð Steinsins, nytjamarkaðar í Neskaupstað, rataði nýlega sannkallaður dýrgripur, hið sívinsæla Matador. Það sem gerir spilið merkilegt er að hér er um að ræða fyrstu útgáfu spilsins á íslensku frá árinu 1939 og því sjaldséður hvítur hrafn á ferðinni. „Við fundum það í bókakassa sem skilinn var eftir fyrir utan húsið hjá okkur,“ segir María Lind Kristjánsdóttir, ein þeirra sem sjá um markaðinn. Hún segir mikla lukku að sjálf hafi hún ekki tekið upp úr þeim kassa því þá hefði það að öllum líkindum endað í ruslinu. „Hún Elín hefur svo mikið auga fyrir svona dýrgripum og það var hún sem kom auga á spilið, sem var í nokkrum hlutum inni á milli bóka og annarra hluta,“ segir María.

Hún tók spilið að sér og lét meta hverslags væri. „Þá kemur upp úr krafsinu að hér er fyrsta útgáfa Matador á íslensku og því antíkbragur á þessu öllu,“ útskýrir hún og bætir við að samkvæmt matinu væri hægt að selja það á hátt í fjörutíu þúsund krónur. „Ef kassinn hefði verið utan um hefði spilið verið umtalsvert verðmætara, segja þeir,“ bætir hún við.

María segir að spilinu verði komið vel fyrir á nytjamarkaðnum góða, og stefnan sé að koma upp sérstökum skáp fyrir svona dýrgripi. Aðspurð um hvort hægt verði að kaupa spilið segir hún það ekki falt og bætir við glaðlega: „Eða svona, ef það kæmi nógu gott boð í það, þá er aldrei að vita hvort við myndum selja það.“

Dugleg að styrkja

Nytjamarkaðurinn í Neskaupstað hefur verið starfræktur síðan árið 2002. „Við fáum til okkar gamalt dót úr öllum mögulegum áttum, mikið til frá heimafólki og úr fjörðunum í kring,“ segir hún. María segir nytjamarkaðinn býsna vinsælan meðal Austfirðinga og hlutina sjaldnast staldra lengi við. „Við náum stundum ekki einu sinni að taka upp úr kössunum og iðulega bíður fólk við dyrnar áður en við opnum á laugardögum,“ skýtur hún að.

María segir afar gleðilegt hve nytjamarkaðurinn hefur fallið vel í kramið meðal Norðfirðinga og allra nágranna, en markaðurinn leggur sig fram við að gefa ágóðann til góðgerðarmála og nefnir hún styrki til langveikra barna og foreldra þeirra, Mæðrastyrksnefndar og Rauða krossins auk annarra. Allt starf sem viðkemur markaðnum er unnið af sjálfboðaliðum.