Fékk Swarovski-steina frá Sonia Rykiel

Fatahönnunarsýning annars árs nema í Listaháskólanum fór fram á fimmtudagskvöld. Sýningin, sem fór fram í Hörpu, var einstaklega glæsileg, en hún er afrakstur fimm vikna námskeiðs fatahönnunarbrautar.

„Þetta var alveg geðveikt. Mikil vinna og margar svefnlausar nætur, en alveg þess virði,“ segir Manuela Ósk Harðardóttir. Línan hennar var einkar glæsileg og segist hún hafa fengið góða hjálp frá utanaðkomandi aðilum. 

„Eggert feldskeri hjálpaði mér mikið og hann á mikið þakklæti skilið, en ég gerði bomberjakka þar sem ermarnar voru úr feld sem hann aðstoðaði mig við að gera. Einnig aðstoðaði Selma Ragnars klæðskeri mig mikið,“ segir hún.

Annað efni í línuna segist hún hafa keypt í París og New York á ferðalögum sínum þangað, meðal annars sérstaklega meðhöndlað nautsleður. Henni barst svo óvæntur glaðningur frá vinum sínum í París. „Ég kom heim einn daginn og þá höfðu þau hjá Sonia Rykiel sent mér nokkur æðisleg efni og fullt af Swarovski-steinum sem var ótrúlega sætt af þeim,“ segir Manuela en hún hefur undanfarið ár verið aðstoðarkona hjá þeim yfir tískuvikurnar.

Manuela segist ekki ætla að selja línuna sína. „Það er ekki mælt með því. Það er svo ótrúlega mikilvægt fyrir okkur að eiga og geta sýnt hvað við vorum að búa til. Hins vegar passa ég í flest fötin, þannig að ég kannski nota þau við gott tilefni,“ segir hún og hlær.

„Það var aðalvinnan hjá mér að sauma rétt saman. Það er ekkert grín að blanda saman stífum efnum og svo léttari efnum eins og silkinu,“ segir Sóley Jóhannsdóttir. Hennar lína einkenndist af minimalískri grafík.

Efnin pantaði hún frá Englandi, sem hún segir að hafi verið mun ódýrara en að kaupa þau hér heima. „Það er hægara sagt en gert að fá góð efni hér heima á góðu verði, en ég vann með bambussilki og bómull. Ég litaði græna efnið í vél, en það hvíta litaði ég með tei til þess að fá þennan off-white lit,“ segir hún. Sóley segist hafa saumað alla línuna sjálf, með örlítilli hjálp frá ömmu sinni.