Fer í sveitina að leita að páskahænunni

Hvað ætlar þú að gera í páskafríinu Aldís Elfa?



Fyrst fer ég með mömmu, afa og ömmu í sveitina í nokkra daga. Við ætlum að borða páskaegg og leita að páskahænunni sem mætir á hverju ári og verpir súkkulaðieggjum í hænsnakofanum hjá langafa. Það hefur samt enginn séð hana enþá nema langafi.

Síðan fer ég á Hvolsvöll til Hrafnhildar ömmu og eyði restinni af páskunum með pabba, Klöru og Daníel Breka, litla bróður mínum.

Ferðu oft í sveitina?

Já, í ömmuhús á Böðmóðsstöðum. Þar leik ég mér og fer í heimsóknir. Ég fer stundum til langafa og langömmu en oftast til Hrannars frænda míns. Við gerum fullt skemmtilegt saman, skoðum dýrin, förum á hestbak með Huldu Köllu frænku minni, leikum okkur og drullumöllum.

Segðu mér meira frá dýrunum sem þú þekkir.

Ég á hund hjá pabba mínum sem heitir Skotta en í sveitinni eru hestar, beljur, kindur, hænur, kanínur, hundar og köttur. Uppáhaldsdýrin mín eru hestar, ég fæ stundum að fara á hestbak.

Hefur þú séð dýr fæðast?

 Já einusini sá ég lamb fæðast þegar ég var hjá Ásu ömmu í Grindavík.

Hvað heitir besti vinur þinn eða vinkona?

Helena er besta vinkona mín, við erum alltaf í fyndnum og skemmtilegum leikjum saman.

Hver er uppáhaldsmaturinn þinn?

Píta og pizza.



Hvað finnst þér skemmtilegast af öllu að gera?

Mér finnst skemmtilegast að syngja, leika mér í tölvunni og fara í sund.

Ertu farin að spá í hvað þig langar að verða þegar þú verður stór?

Ég ætla að verða læknir og tölvufræðingur sem býr til tölvuleiki.