Með kirkjugarð úr öskunni í eldinn

Nauðsynlegt er að hefjast handa við gerð nýs kistukirkjugarðs í ár. Þetta kemur fram í bréfi sem Þórsteinn Ragnarsson, forstjóri Kirkjugarða Reykjavíkurprófastsdæmis, sendi umhverfis- og skipulagssviði Reykjavíkurborgar þann 3. desember.

Í bréfinu segir Þórsteinn að árið 2003 hafi kirkjugarðarnir fengið úthlutað 22 hektara landi undir kistukirkjugarð á uppfyllingu suðvestan við Úlfarsfell. Eftir efnahagshrunið 2008 hafi þótt ljóst að næsti kirkjugarður yrði ekki á uppfyllingu við Úlfarsfell heldur þar sem hentugur jarðvegur er til staðar að mestu leyti. Hafi í því sambandi verið bent á Geldinganesið. Kirkjugarðarnir hafi því sótt um lóð þar líka.

Þórsteinn segir að kirkjugarðarnir hafi fengið vilyrði fyrir kirkjugarðastæði í Geldinganesi en um leið, og án vitneskju ráðamanna kirkjugarðanna, hafi landið við Úlfarsfell verið tekið af skipulagi sem kirkjugarður.

„Í ljós hefur komið síðustu misseri að lítil sem engin skipulagsvinna er komin af stað í Geldinganesi og enn síður að búið sé að ákveða hvar kirkjugarður eigi að vera þar og hvernig eigi að tengja hann við umheiminn. Það er því eins og að fara úr öskunni í eldinn að fá úthlutað landi á óskipulögðu svæði. Þetta reyndust ekki góð skipti,“ segir hann.

Þórsteinn sagði í samtali við fréttastofu Stöðvar 2 um jólin að hann hefði ítrekað, en án árangurs, reynt að fá svör frá Reykjavíkurborg varðandi framhaldið. Hann hefur svo verið boðaður á fund umhverfis- og skipulagsráðs Reykjavíkurborgar á morgun.

Hjálmar Sveinsson, formaður umhverfis- og skipulagsráðs, segir að kirkjugarðurinn sé samkvæmt gildandi aðalskipulagi í Geldinganesi og langeinfaldast væri að láta það standa. Það sé svolítið mál að breyta aðalskipulagi. „Þótt það myndi ekki krefjast neinnar allsherjarendurskoðunar þá væru reitir sem þyrfti að endurskipuleggja. Það þurfa að vera góð rök til að breyta því og það getur vel verið að þau rök séu fyrir hendi. En við þurfum bara að fá það fram,“ segir hann.

Hjálmar segir að umhverfis- og skipulagsráð muni gefa sér smá tíma til að fara yfir rökin með eða á móti hvorri staðsetningunni. „Við ætlum meðal annars að fá á fundinum á miðvikudaginn yfirlit frá umhverfissviði yfir verðmæti lands sem færi undir kirkjugarð, annars vegar í Geldinganesi eða við Úlfarsfellið,“ segir Hjálmar.