Júlíspá Siggu Kling - Sporðdreki: Vanilla gerir þér gott

Elsku fagri sporðdrekinn minn. Þú ert gæddur svo góðri eftirtekt að það virðist ekkert fram hjá þér fara. Þú hefur svo mikinn áhuga á fólki og það er eins og þú vitir hvað er að fara að gerast hjá sumum. Þú þarft að efla þennan kraft hjá þér og muna að fyrsta hugsunin er sú rétta.

Þú hefur svo mikið fegurðarskyn og þér finnst gaman að sanka að þér einhverju fallegu. Þú ert eins og hrafninn. Það væri gott núna að breyta inni á heimili þínu, pakka niður, gera hlutina einfalda til að byggja upp sterkari orku. Þig vantar orku fyrir næstu skref svo þú skalt búa hana til. Vanilla hefur til að mynda góð áhrif á þig og gefur þér jafnvægi.

Ég sé að það er eins og þú sért að búa þig undir að fara í víking. Þú ert að íhuga einhver plön og í guðanna bænum – þú skalt þora!

Ef þú ert, elsku sporðdreki, á því tímabili þar sem ekkert hefur verið að gerast í lengri tíma þá þarftu að hrista rimlana. Almættið er tilbúið að hjálpa þér og þú þarft bara að þora. Það er ekkert fegurra en hugrakkur sporðdreki sem ræðst á krókódílinn, þó að hann sé þúsundfalt stærri. Þegar líða tekur á skaltu sækja um stöðuna sem þú býst ekki við að fá. Það er nefnilega að eflast hjá þér sjálfstraustið og ef þú lítur í spegil þá sérðu að þú hefur kraftinn til að gera allt.

Þú átt að umfaðma spennuna sem er í þér, hún heldur þér á lífi og gerir allt svo skemmtilegt. En í ástamálunum áttu aftur á móti ekki að umfaðma spennu. Þeir sporðdrekar sem eru á lausu ættu að skoða manneskju sem styrkir þá og er hægt að treysta, það er nóg komið af hinu! Þú átt eftir að finna sanna gleði og gleðin er í hinu smáa, elskan mín. Alls ekki fara inn í sambönd sem eru byggð á vitleysu og blekkingu. Þú hefur ekki tíma til þess.

Mottó: Mátturinn býr í núinu og morgundagurinn leysist.



Frægir sporðdrekar: Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona.