Kristófer heldur áfram að rífa niður fráköstin fyrir Furman

Kristófer Acox og félagar í Furman-háskólanum máttu þola risatap, 84-49, í bandaríska háskólakörfuboltanum í kvöld.

Furman-liðið var 41-25 undir í hálfleik og heimamenn í Greensboro héldu áfram að valta yfir gestina í þeim síðari sem sáu aldrei til sólar.

KR-ingurinn Kristófer Acox skoraði sjö stig fyrir Furman í leiknum og tók tíu fráköst, en hann var frákastahæstur á vellinum einu sinni sem oftar.

Kristófer hefur verið að spila vel fyrir Furman sem gengur þó ekki nógu vel, en það er búið að vinna sjö leiki og tapa 20.

Sjálfur er Kristófer frákastahæstur í suðurriðlinum sem Furman spilar í.