Anton og Jónas gáfu Nikola Karabatic rautt og bróður hans tvær mínútur fyrir leikaraskap

Paris Saint-Germain vann MVM Veszprém, 29-27, í risaslag í A-riðli Meistaradeildarinnar í handbolta í gærkvöldi. Þetta var fyrsta tap Aron Pálmarssonar og félaga í Veszprém á þessari leiktíð í Meistaradeildinni og jafnframt fyrsti sigur PSG á Vezprém.

PSG var fjórum mörkum yfir í hálfleik, 16-12, en undir forystu Arons Pálmarssonar jafnaði Veszprém leikinn í 22-22 í seinni hálfleik. PSG var þó sterkara á lokasprettinum og innsiglaði góðan sigur.

Sjá einnig:Aron sýndi að hann er einn sá besti | Sjáðu mörkin og stoðsendingarnar

PSG spilaði síðustu 15 mínútur leiksins án besta handboltamanns heims, Nikola Karabatic, en hann fékk beint rautt spjald frá íslenskum dómurum leiksins; Antoni Gylfa Pálssyni og Jónasi Elíassyni. Karabatic gat ekkert kvartað enda sló hann Ivan Sliskovic, skyttu Veszprém, beint í andlitið.

Bróðir Nikola, Luka Karabatic, sem er einn besti varnarmaður heims og varð heimsmeistari með Frökkum í Katar fyrr á þessu ári ásamt bróður sínum, kom sér líka í vandræði hjá íslensku dómurunum.

Leikmenn PSG fengu almenna viðvörun um miðbik fyrri hálfleiks fyrir að láta sig falla of auðveldlega í varnarleiknum þegar þeir voru að reyna að fiska ruðning. Aðeins tíu sekúndum eftir þá viðvörun henti Luka Karabatic sér í gólfið og fékk tveggja mínútna brottrekstur frá Antoni og Jónasi.

Þessa tvo dóma Antons og Jónasar má sjá í spilaranum hér að ofan.