Birna Berg fer ekki til Þýskalands

Ekkert verður af því að Birna Berg Haraldsdóttir komi til þýska félagsins Koblenz/Weibern eins og til stóð. Birna Berg sleit krossband í hné í leik með íslenska landsliðinu í byrjun síðasta mánaðar.

Fram kom á heimasíðu félagsins í dag að það hafi verið niðurstaða beggja aðila að rifta samningnum. Þar segir að hún verði í endurhæfingu á Íslandi og í Svíþjóð, þar sem hún lék með Sävehof á síðustu leiktíð.

Birna Berg hafði samið til Koblenz/Weibern til tveggja ára með uppsagnarákvæði eftir fyrra árið. Hildur Þorgeirsdóttir var einnig á mála hjá félaginu en hún er gengin til liðs við Fram.