Tíundu bekkingar áhyggjufullir: „Ég veit hvernig ég útskrifast úr grunnskóla en hef ekki hugmynd um hvernig ég kemst inn í framhaldsskóla“

Þau Tristan Elvuson, Viktor Andrason, Embla Óðinsdóttir og Elfa Hlynsdóttir eru nemendur í 10. bekk í Réttarholtsskóla og hafa öll fengið fræðslu um fyrirkomulag námsmats í ár. Þau vita því hvernig þau útskrifast úr grunnskóla en ekki hvernig þau komast inn í framhaldsskóla og eru sum hrædd um að mistakast í hæfnisprófi.

Menntamálastofnun stefnir að því að bjóða nýtt hæfnispróf næsta vor þannig að þeir framhaldsskólar sem það kjósa geti notað það við inntöku. Arnór Guðmundsson, forstjóri Menntamálastofnunar, sagði í viðtali við Fréttablaðið í gær að viðræður stæðu yfir við skólastjóra grunnskóla og framhaldsskóla enda breytingarnar umfangsmiklar.

Formaður Skólastjórafélags Íslands, Svanlaug María Ólafsdóttir, segir ekkert samráð hafa verið um hæfnispróf sem eru í þróun hjá Menntamálastofnun. Hún segir sérkennilegt að treysta ekki námsmati grunnskóla. 

Ekki hefur verið endanlega ákveðið hvernig fyrirkomulag hæfnisprófa verður en þau verða unnin og þeim stýrt af hálfu Menntamálastofnunar. 

Munar miklu á B í Réttó og annars staðar

Um hæfnisprófin spyr Svanhildur sig af hverju ekki sé hægt að treysta niðurstöðum námsmats úr grunnskóla út frá þeim hæfnisviðmiðum sem eiga að vera að baki bókstafaeinkunnum.

„Af hverju ekki að treysta niðurstöðum námsmats út frá þeim viðmiðum sem menntamálaráðuneytið hefur sjálft sett, eru viðmiðin þá ekki nothæf?“

„Ég veit það upp að vissu marki hvernig námsmat fer fram í lok vetrar en ekki alveg,“ segir Tristan.

Hann segist líka hafa vitað af því að það væri stefnt að hæfnisprófum.

„Ég vissi af þeim en veit ekki hvernig þau verða framkvæmd. En að vissu leyti er sanngjarnara að taka svona próf,“ bætir hann við.

„Það munar svo miklu á B í Réttó og B í einhverjum öðrum skóla.“

Gæti hugsað sér að taka hæfnispróf

Viktor Andrason er einnig nemandi í 10. bekk í Réttarholtsskóla. 

Viktor segist heldur ekki vita alveg nákvæmlega hvernig árangur vetrarins verður metinn.

„Ég veit aðeins það sem kennarar og skólastjórar hafa sagt okkur,“ segir Viktor.

„Ég myndi hugsa um að taka hæfnispróf ef þörf væri á,“ bætir hann við.

„Ég vissi ekki að það væri búið að ákveða þau en vissi samt að þau væru í umræðunni tengd ákveðnum skólum.“

Ein lítil villa getur skemmt töluvert

Embla hefur kynnt sér málið afar vel og leitað eftir upplýsingum um mat á árangri.

„En samt finnst mér margt mjög óskýrt í þessum efnum,“ segir Embla.

„Það er óljóst hvernig sumir þættir námsins eru metnir og menntaskólar fá ekki að vita alla stöðuna. Þeir fá óskýra mynd,“ segir hún og veltir fyrir sér einkunnagjöfinni.

„Ef ég fæ mörg A en eitt B og eitt C, þá fæ ég kannski C+. Styrkleikar hvers og eins eru ekki sýnilegir í samantektinni,“ segir Embla.  

„Ein lítil villa getur skemmt töluvert fyrir þér.“

Allt undir á einum degi

Elfa segist mundu leggja það á sig að fara í hæfnispróf ef hún þarf. Hana langar í Menntaskólann í Hamrahlíð.

„Ég veit hvernig ég útskrifast úr grunnskóla en hef ekki hugmynd um hvernig ég kemst inn í framhaldsskóla,“ segir hún.

„Hæfnisprófin eru ekki endilega sanngjörn, við erum svo misjöfn. Þú gætir hitt á vondan dag þegar prófið er, kannski hefur þú verið veik eða líður illa. Á meðan annar á góðan dag.“

Mikið sé undir á prófdeginum sjálfum.

„Frammistaða alls ársins er metin í einu prófi þennan eina dag,“ segir hún og segist ekki viss um að það sé góð aðferð.

Þau Tristan, Viktor, Elfa og Embla eiga framtíðina fyrir sér, þau hittu blaðamann í Réttarholtsskóla.