Kanadíski þáttagerðarmaðurinn: "Skítur skeður eins og maður segir“

Andrew Lindy, sem gerir þættina Travel Bum, segir Íslendinga vera mótsagnakennda og byggir þá skoðun sína á hörðum viðbrögðum við birtingu myndbanda sem hann tók þegar hann var hér á landi.

Í þáttum sínum, sem hann birtir á YouTube, ferðast Lindy til fjarlægra landa í von um að kynnast konum og sænga hjá þeim. Lindy sagði að minnsta kosti einni íslenskri stúlku að hann væri að vinna í þætt fyrir sjónvarpsstöðina Showtime í Kanada. Þátturinn fór aldrei á Showtime.

Blaðamaður Mbl.is náði sambandi við Lindy í gegnum Facebook. Þar sagðist Lindy vera þann sem hefði verið blekktur. Showtime hafi ætlað að sýna þáttinn en ekkert orðið úr. Hann segist ekki hafa viljað sleppa því að birta myndböndin sem hann hafði tekið.

„Skítur skeður eins og maður segir. Þetta er vinnan mín, stelpurnar samþykktu og skrifuðu undir og núna er ég með þetta á netinu," segir hann í samtali við mbl.is.

Í viðtalinu heldur Lindy því fram að samningur hafi verið gerður við allar stúlkurnar þess efnis að hann ætti efnið og mætti birta það. Í frétt Pressunnar um málið kemur fram að Margrét Ásta, ein stúlknanna sem er til umfjöllunar í þætti Lindy, hafi sýnt blaðamanni samninginn sem hún gerði við Lindy. Lögfræðingur fór yfir samninginn og sagði Lindy vera réttu megin laganna, þó svo að framkoma hans gagnvart Margréti væri „vafasöm“.

Sjá einnig:Kanadískur maður blekkti íslenskar stúlkur til að fækka fötum í myndbandi

Í samtali við mbl.is segir Lindy viðbrögðin vera mótsagnakennd, kallar þau „íslenska afneitun“. Honum finnst skrýtið hve frjálslyndir Íslendingar eru þegar það kemur að kynlífi en að þeir sýni tepruskap þegar sannleikurinn kemur út.

Hann var þá spurður hvort að það væri ekki eitt að stunda kynlíf í einrúmi og annað að taka það upp á myndbandi sem allir geti skoðað.

„Að segja já við amerískum sjónvarpsþáttum en vita ekki að það muni ná til Íslands er þýðingarlítið litbrigði."