Strákarnir okkar allir mættir til Kölnar

Öll liðin fjögur sem taka þátt í úrslitahelgi Meistaradeildarinnar í handbolta; Kiel, Barcelona, Kielce og Veszrpém, eru mætt til Kölnar í Þýskalandi þar sem Final Four fer fram sjötta árið í röð.

Í fyrri undanúrslitaleiknum mætir Barcelona liðið Kielce, en útsending hefst á Stöð 2 Sport klukkan 13.10 á laugardaginn.

Seinni undanúrslitaleikurinn er viðureign Kiel og Veszprém frá Ungverjalandi, en útsending frá honum hefst klukkan 15.50 á Stöð 2 Sport 3.

Barcelona-liðið mætti fyrst til Kölnar, en á Facebook-síðu Meistaradeildarinnar má sjá myndir af liðunum mæta á hótelið þar sem þau gista.

Guðjón Valur var einbeittur á svip enda ætlar hann sér að bæta Meistaradeildartitlinum í sarpinn. Hann hefur fjórum sinnum komist í undanúrslit en aldrei unnið.

Alfreð Gíslason, Aron Pálmarsson og strákarnir í Þýskalandsmeistaraliði Kiel voru síðastir til Kölnar þrátt fyrir að vera eina þýska liðið í undanúrslitunum.

Flugi Kiel seinkaði en nú eru allir mættir á staðinn og klárir í slaginn á laugardaginn.

Alfreð Gíslason hefur tvisvar sinnum unnið Meistaradeildina eftir að byrjað var að spila með Final Four-fyrirkomulaginu og vonast eftir sínum þriðja titli með Kiel í Köln um helgina. Alls hefur hann unnið Meistaradeildina sem þjálfari fjórum sinnum.