Lars Lagerbäck í hópi 50 bestu þjálfara heims samkvæmt úttekt FourFourTwo

Lars Lagerbäck, annar landsliðsþjálfara Íslands, er í hópi 50 bestu þjálfara heims samkvæmt úttekt á vefsíðu tímaritsins FourFourTwo.

Lars er í 41. sæti á lista FourFourTwo en í umsögn um Svíann segir m.a.: „Ísland hafði aldrei verið nálægt því að gera sig gildandi í alþjóðafótbolta og Svíinn reyndi virtist vera að hverfa úr sviðsljósinu þegar hann tók við liðinu.

„En Lagerbäck sá spennandi hóp með ungum og hæfileikaríkum leikmönnum og leiddi þá í umspil um sæti á HM 2014 - þar sem Ísland tapaði fyrir Króatíu.“

Lars er einnig hrósað fyrir að hafa tekist að koma Íslandi aftur í baráttuna um sæti á stórmóti eftir vonbrigðin gegn Króatíu.

„Lagerbäck hefur búið til þétt og tæknilega gott lið sem er að mörgu leyti eins og félagslið. Ísland er með fimm stiga forystu á Holland í A-riðli undankeppninnar og sigur á Hollendingum í Amsterdam í september fer langt með að tryggja liðinu sæti í lokakeppninni,“ segir ennfremur í umsögninni.

Einn af mótherjum Lars í undankeppninni, Pavel Vrba þjálfari Tékklands, er í 48. sæti listans en það á enn eftir að birta 10 efstu þjálfarana.

Herve Renard, nýráðinn þjálfari Lille í Frakklandi sem gerði Fílabeinsströndina að Afríkumeisturum í byrjun árs, er í 42. sæti, einu fyrir neðan Lars. Í sætinu fyrir ofan Svíann er Markus Weinzierl sem hefur gert frábæra hluti með Augsburg í Þýskalandi.

Úttekt FourFourTwo má lesa með því að smella hér.