Ásatrúarfélaginu berast stuðningskveðjur að utan

Hilmar Örn Hilmarsson, allsherjargoði Ásatrúarfélagsins, sagði í fréttum Stöðvar tvö í vikunni að félagið hefði sætt gagnrýni að utan fyrir umburðarlyndi sitt og afstöðu til samkynhneigðra. Honum hefðu borist fregnir af hópum sem ætluðu að vitja nýs hofs félagsins, sem á að rísa í Öskjuhlíð á næsta ári, og helga það á sinn hátt svo hægt væri að leiðrétta rangar áherslur frjálslyndra Íslendinga.

„Við höfum því miður fengið hatursgusur að utan fyrir það til að mynda að við höfum látið málefni samkynhneigðra okkur varða og börðumst lengi fyrir þeim rétti að fá að gefa saman samkynhneigð pör,“ sagði Hilmar Örn á mánudaginn.

Viðbrögð erlendra lesenda við frétt Vísis og Iceland Magazine um málið benda til þess að þessir hópar séu í minnihluta í samfélagi heiðinna. Langflestir sem tjá sig í ummælakerfi Iceland Magazine og í umræðum um fréttina á samskiptavefnum Reddit segjast styðja Ásatrúarfélagið og afstöðu þeirra gagnvart samkynhneigðum.

„Ég er bandarískur heiðingi og þið hafið allan stuðning minn,“ skrifar til að mynda einn lesandi. „Það hefur greinilega farið fram hjá nokkrum þessara gagnrýnenda að það að sækja annan heim er helgur virðingarvottur.“

Aðrir segjast deila upplifun Hilmars af yfirlýstum Ásatrúarmönnum sem fordæmi samkynja hjónavígslur þrátt fyrir heimildir sem bendi til þess að heiðingjar á Norðurlöndum hafi ekkert haft á móti samkynhneigð. Þá lýsa margir yfir áhuga á að heimsækja hofið þegar það opnar.

„Ég styð vinnubrögð Ásatrúarfélagsins í nútímasamfélagi okkar,“ skrifar annar bandarískur heiðingi. „Heimsókn í hofið er á fötulistanum mínum. Heilsa!“