Ég held að þetta sé allt lygi, segir Bubbi

Efnaverkfræðingur sem vann matsskýrslu vegna Silicor Materials á Grundartanga segir þetta einhverja hreinustu stóriðju sem um getur. Bubbi Morthens, tónlistarmaður og íbúi í Hvalfirði, segist ekki trúa þessu og að með ólíkindum sé að verksmiðjan skyldi ekki fara í umhverfismat.

Stefnt er að endanlegri ákvörðun um byggingu sólarkísilverksmiðju á Grundartanga í kringum næstu mánaðamót. Skipulagsstofnun úrskurðaði fyrir ári að hún væri nánast mengunarfrí og þyrfti því ekki að sæta umhverfismati. VSÓ ráðgjöf vann matsskýrsluna fyrir Silicor.

„Við skoðuðum öll gögn sem Silicor leggur fram og niðurstaða okkar, eftir að hafa skoðað þau gögn, er að þetta sé alls ekki mengandi. Þetta er líklega einhver hreinasta stóriðja sem þú getur nokkurntíman reist,“ segir Guðjón Jónsson, efnaverkfræðingur hjá VSÓ ráðgjöf.

Framleiðslan verði efni í sólarrafhlöður. „Og það er mjög gaman að geta gert það á jafn mengunarlausan hátt og þarna er gert,“ segir Guðjón.

Bubbi Morthens, tónlistarmaður og íbúi í Hvalfirði, segist hvorki trúa þessu né treysta. Reynslan af verksmiðjunum tveimur á Grundartanga sé slík. 

„Ég sé hvað þeir eru að gera á nóttinni. Ég sé þegar þeir sleppa út. Og þegar það er klagað og kvartað þá er sagt: Mistök. Mistök. Þetta gerist ekki aftur. 

Síðan er það þannig að þeir fá að mæla sína mengun sjálfir. Og þú getur ímyndað þér niðurstöðuna,“ segir Bubbi. 

Í grein í Fréttablaðinu fyrir helgi spurði Bubbi hvort fullnægjandi sannanir væru fyrir því að flúor yrði ekki losaður út í andrúmsloftið, sagði óljós svör um flúormengun, Hvalfjörður yrði menguð ruslakista. 

Guðjón Jónsson segir þetta algerlega ástæðulausar áhyggjur. 

„Vegna þess að þarna er enginn flúor, ekkert brennisteinsdíoxið og þetta mun engin áhrif hafa á iðnaðarsvæðið eins og það er skilgreint í dag.“

Guðjón kveðst skilja áhyggjur manna, þetta sé vissulega stóriðja sem muni sjást, en hún muni ekki menga. Engin mengunarefni séu í ferlinu, sem geti valdið ytri mengun.

„Ég held að þetta sé allt lygi,“ segir Bubbi. 



„Ég er ekki alveg að fatta hvað er þess valdandi að verksmiðja af þessari stærðargráðu er sett niður í Hvalfjörð án þess að fara í umhverfismat. Þetta er með ólíkindum,“ bætir hann við. 



Skipulagsstofnun sagði í yfirlýsingu fyrir helgi að sú niðurstaða, að ekki þyrfti umhverfismat, hefði meðal annars verið byggð á áliti opinberra sérfræðistofnana. Engin þeirra hefði lagt til að starfsemin færi í umhverfismat. Þá bendir stofnunin á að starfsleyfi fáist ekki fyrr en gengið hafi verið úr skugga um hvort forsendur standist. 



„Þannig að gögnin, þau verða að standast. Annars fá menn bara ekki að reisa þessa verksmiðju,“ segir Guðjón Jónsson hjá VSÓ ráðgjöf.