Lög banna framsal íslenskra ríkisborgara

Alfreð Clausen, sem ákærður hefur verið í Bandaríkjunum fyrir fjársvik að upphæð sem nemur um sex milljörðum króna, verður ekki framseldur til Bandaríkjanna. Íslensk lög banna framsal íslenskra ríkisborgara.

Í lögum um framsal sakamanna og aðra aðstoð í sakamálum segir í annarri grein að ekki megi framselja íslenska ríkisborgara. Í gildi er tvíhliða framsalssamningur milli Íslands og Bandaríkjanna frá árinu 1902. Það sé ekki skilyrði samkvæmt íslenskum lögum að til staðar sé framsalssamningur milli ríkja til þess að framsal geti farið fram en slíkt fer einnig eftir reglum þess lands sem framsalsbeiðni kemur frá.

Lögmaður Alfreðs, Vilhjálmur H. Vilhjálmsson, sendi í gær frá sér yfirlýsingu vegna málsins. Í yfirlýsingunni lýsir Alfreð sig saklausan af þeim sökum sem á hann eru bornar og lítur svo á að hann sé hugsanlega vitni í málinu en ekki sakborningur. Sá skilningur kemur ekki fram í ákæru, sem gefin var út þann 5. mars. Þar kemur fram að Alfreð er ákærður í 74 liðum. Er Alfreð, ásamt tveimur viðskiptafélögum hans, ákærður fyrir fjársvik, þjófnað og peningaþvætti.

Vilhjálmur segir umbjóðanda sinn telja að óeðlilega hart sé tekið á þessu máli. „Umbjóðandi minn telur að allt of hátt sé reitt til höggs í ákærunni og bendir í því sambandi á að saksóknari San Bernardino-sýslu sé í miðri kosningabaráttu og sækist eftir því að verða dómsmálaráðherra í Kaliforníufylki. Það kunni að skýra þetta offors ákæruvaldsins í málinu að hann sé kominn í kosningabaráttu,“ segir Vilhjálmur.

Alfreð mun ekki fara til Bandaríkjanna að sinni en segist ekki vera í felum. Hann sé íslenskur ríkisborgari og hafi verið búsettur hér síðan síðasta haust og hafi aldrei verið boðaður í skýrslutöku hjá lögregluyfirvöldum ytra. Samkvæmt yfirlýsingu er Alfreð boðinn og búinn að ræða við íslensk lögregluyfirvöld sem og bandarísk hér á landi.

Samkvæmt fjölmiðlafulltrúa saksóknaraembættisins í San Bernardino-sýslu getur saksóknari ekki veitt frekari upplýsingar um málið að svo stöddu. Gríðarlegur fjöldi fyrirspurna hefur borist embættinu frá Íslandi vegna málsins.

Viðskiptafélagar Alfreðs, þeir Joshua Cobb og Stephen Siringoringo, voru handteknir vegna málsins þann 5. mars síðastliðinn.