Leituðu að bréfi Tongs

„Við höfum gert leit að þessu í forsætisráðuneytinu og við finnum ekki bréfið frá Tong. Það hefur ekki borist hingað í ráðuneytið. Það er svo einfalt. Þannig er bara staðan. Við höfum ekki slíkt bréf undir höndum,“ segir Sigurður Már Jónsson, upplýsingafulltrúi ríkisstjórnarinnar, spurður hvort ráðuneytinu hafi borist erindi Anote Tongs, forseta Kíribatí, sem hann sendi öllum þjóðarleiðtogum um að sett yrði alþjóðlegt bann við nýjum kolanámum í heiminum í ljósi loftlagsbreytinga.

Anote Tong talaði um fljót­andi eyj­ar, gríðar­stóra sjáv­ar­veggi og aðrar aðgerðir til að bjarga eyrík­inu frá af­leiðing­um hækk­andi sjáv­ar­borðs. Forseti Kíribatí-eyja sagði að næðu menn ekki samkomulagi um hámarkshitun 1,5 gráður myndi Kíribatí sökkva í sæ.

Í bréfi Tongs til þjóðarleiðtoga færir hann þeim blessun sína, „Kam na bane ni Mauri“, sem mætti útleggja sem „megi okkur alltaf heilsast vel“.

Hann biður um stuðning í baráttu eyjaskeggja gegn loftlagsbreytingum með því að leggjast gegn byggingu nýrra kolanáma á alheimsvísu.

Tong hefur miklar áhyggjur af því að Kíribatí muni sökkva í sæ vegna loftlagsbreytinga og segir aðkallandi að bregðast strax við og biður því um stuðning þjóðarleiðtoga.

„Bygging hverrar nýrrar kolanámu grefur undan hverju því samkomulagi sem við náum í París,“ segir hann í bréfinu.

Katrín Jakobsdóttir, formaður VG, hefur lagt fram fyrirspurn til Sigmundar Davíðs Gunnlaugssonar forsætisráðherra um afstöðu hans til kröfu Kíribatí og spyr hvort krafa Kíribatí verði studd af Íslands hálfu.

„Það er bagalegt ef ráðuneytinu hefur ekki borist bréfið því samkvæmt þeim upplýsingum sem ég fékk var að það hefði verið sent öllum þjóðarleiðtogum. Í ljósi loftslagsráðstefnunnar í París og þess samkomulags sem var undirritað þar er gríðarlega mikilvægt að þjóðir heims fari að taka afstöðu til nýrra verkefna á sviði jarðefnaeldsneytis. Þetta skiptir auðvitað miklu máli fyrir þessar þjóðir, eyríkin sem eiga á hættu að hverfa undir vatn. Ég hefði talið að Ísland með sína endurnýjanlegu orkugjafa ætti að vera í forystu í svona málum á alþjóðavettvangi, þess vegna lagði ég fram fyrirspurnina.“

„Við munum svara fyrirspurn Katrínar en eins og ég sagði áður, þá hefur okkur ekki borist þetta erindi frá Tong,“ ítrekar Sigurður Már. Fréttablaðið spurðist einnig fyrir á skrifstofu forseta Íslands, hvort bréfið hefði borist þangað, en svo var ekki.