Lentum á bólakafi í krapa og festumst

Hvað heitir þú og hvað ertu gömul? Heba Sól Stefánsdóttir og er 11 ára.

Hvað er það fyrsta sem þú manst eftir? Ég man í leikskóla þegar vinkona mín var að borða spagettí og það kom spagettí út úr nefinu á henni og ég vildi vera eins og tróð spagettí upp í nefið á mér.



Hver er uppáhaldsnámsgreinin þín í skólanum? Stærðfræði.



Hvað er það skemmtilegasta sem þú gerir? Það er margt; teikna, mála, föndra, tefla skák, syngja í kór, spila á píanó og vera í blaki en ferðalög með fjölskyldu og vinum, útivera og skíðamennska eru í mestu uppáhaldi.

 Ég fer oft í jeppaferðir með fjölskyldunni og stundum með pabba í vinnunni. Þá sé ég fullt af nýjum stöðum, er úti að leika í náttúrunni, spila og lendi í ævintýrum.



Áttu þér eftirlætisstað á Íslandi? Eiginlega eru þeir margir en einn þeirra er í miklu uppáhaldi, það eru Tindfjöll. Þar eigum við skála og við komum yfirleitt þegar það er snjór og stundum kemur pabbi með vélsleða og dregur okkur upp brekkurnar og við skíðum niður. Svo er líka svo kósí í skálanum.

Geturðu sagt okkur frá einhverju ævintýri? Eitt sinn þegar ég fór með pabba inn í Landmannalaugar þá vorum við tíu tíma á leiðinni og það var 22 stiga frost. Við ætluðum að hjálpa bíl sem var fastur en lentum sjálf á bólakafi í krapa og festumst.

Við sátum föst í þrjá tíma en vorum svo heppin að hinn bíllinn var búinn að kalla í hjálparsveit sem kom og dró okkur upp. Þegar við komum var klukkan orðin tvö um nótt.



Ertu byrjuð að skreyta fyrir jólin? Við erum búin að setja jólaljós úti en skreytum meira á næstu dögum.