Vara við stormi í dag - búist við miklum kulda í miðri vikunni

Veðurstofa Íslands varar við stormi í dag á Vestfjröðum og suðaustantil á landinu. Búist er við norðaustanátt, 15 - 23 metrar á sekúndu, rigningu eða slyddu en snjókomu til fjalla. Yfirleitt hægari vindur suðvestantil og þurrt að kalla. Hiti 0 til 6 stig.

Inni á vef Veðurstofu Íslands er að finna hugleiðingu veðurfræðings sem segir djúpa lægð suðaustan við landið í samvinnu við hæðina yfir Grænlandi valda hvössum vindi á landinu í dag.

Þessu fylgir úrkoma, rigning á láglendi, en slydda og síðar snjókoma eftir því sem hærra er farið yfir sjávarmál. Ferðalangar ættu að huga að veðri og færð áður en lagt er í hann, það má búast við hríðarveðri á fjallvegum á norðan- og austanverðu landinu. Einnig verður hviðótt við fjöll, en snörpustu hviðurnar verða í Öræfum, þar geta þær náð yfir 40 m/s. Suðvestur fjórðungur landsins sleppur skást útúr deginum í dag. Þar verður vindur hægari og ekki er búist við úrkomu.

Á morgun og dagana þar á eftir verður áfram norðanátt á landinu með éljum norðan- og austanlands. Má búast við miklum kulda en spár gera ráð fyrir að loftið yfir landinu uppúr miðri viku verði með því kaldasta sem gerist í nóvember. Langtímaspár gera þó ráð fyrir að hlýtt loft sæki að landinu úr vestri um næstu helgi. Mun þó væntanlega taka nokkurn tíma að bola kalda loftinu í burtu, því það getur setið fast fyrir í lægðum í landslagi.