Segja uppbyggingu á höfuðborgarsvæðinu of hæga

Uppbygging íbúðarhúsnæðis á höfuðborgarsvæðinu gengur of hægt að mati borgarfulltrúa Framsóknar og flugvallarvina. Þeir segja áhyggjuefni hve erfiðlega hafi gengið að fylgja húsnæðisstefnu borgarinnar, og telja ólíklegt að áætlanir um fimm þúsund nýjar íbúðir á næstu fimm árum nái fram að ganga, líkt og staðan sé nú.

„Í mars 2014 spáði borgarstjóri, þá formaður borgarráðs, að byrjað yrði að byggja 950 íbúðir á árinu 2014 og í nóvember 2014 spáði hann því að byrjaði yrði að byggja 1900 íbúðir á árinu 2015. Staðreyndin er sú að byrjað var að byggja 597 íbúðir á árinu 2014 og búið er að veita byggingarleyfi fyrir 891 íbúð núna á árinu 2015. Ef áætlanir borgarstjóra nú ganga upp verður byrjað að byggja um 5000 íbúðir næstu fimm árin,” segir í bókun borgarfulltrúanna sem lögð var fram á fundi  borgarstjórnar í dag.

„Verður spennandi að sjá hvort byggðar verða 2500-3000 leigu- og búseturéttaríbúðir á 5 árum en nú er liðið tæpt 1 og ½ ár síðan því var lofað. Hlutverk borgarinnar er að skipuleggja borgina svo hægt sé að byggja og úthluta lóðum.“

Lóðirnar of lengi í höndum annarra

Í bókuninni segir að flestar þær lóðir sem verið sé að byggja á séu lóðir sem hafi verið í höndum annarra aðila en borgarinnar lengi, og ekki að sjá að þar verði til sölu ódýrar íbúðir, eins og sjá megi á fasteignaauglýsingum. Þá er kallað eftir annarri forgangsröðun.

„Setja þarf í forgang að fjölga félagslegum leiguíbúðum, úthluta lóðum undir stúdentaíbúðir og úthluta lóðum til félaga sem rekin eru án hagnaðarsjónarmiða til að byggja leigu- og búseturéttaríbúðir m.a. fyrir ungt fólk sem á ekki eigið fé, kemst ekki í gegnum greiðslumat, býr í foreldrahúsum eða ósamþykktu húsnæði eða leigir á almenna leigumarkaðnum langt umfram greiðslugetu."