Svar við pistli Rósu Guðbjartsdóttur og Guðlaugar Kristjánsdóttur um umbætur í Hafnarfirði

Kæru Rósa og Guðlaug, það var einkennilegt að lesa pistil ykkar sem birtist á Vísi 28. október. Ég hélt jafnvel að þið hefðuð hreinlega sent út rangan pistil!

Sama dag og pistill ykkar birtist í fjölmiðlum voru niðurstöður tillagna meirihluta í bæjarstjórn um forgangsröðun í rekstri birtar þar sem segir beint út að fækka eigi leikskólaplássum og loka eigi leikskólanum Brekkuhvammi við Hlíðarbraut (Kató).  

Þið segið frá því að þið hafið fengið ráðgjafa til að koma með tillögur fyrir ykkur um hvernig hægt sé að ná hagræðingu í rekstri Hafnarfjarðar án þess að skerða þjónustu bæjarbúa. Hér rak mig í rogastans!  Það að loka leikskóla þannig að börn þurfi að ganga í leikskóla utan hverfis myndi ég svo sannarlega telja skerðingu á þjónustu. Ég myndi telja það algjöra afturför.

Ég vil því spyrja ykkur, hvernig skerðir það ekki þjónustu við bæjarbúa að loka leikskólanum? Með lokuninni er ekki einungis verið að loka leikskóla sem á sér um 80 ára sögu í bænum og er löngu orðinn hornsteinn í hafnfirsku samfélagi, heldur er verið að leggja niður grunnþjónustu í hverfinu og senda hana annað.

Hvernig skerðir það ekki þjónustu við bæjarbúa að senda börnin í annað hverfi í leikskóla? Hvers vegna mega börnin hér í Suðurbænum ekki ganga í leikskóla í sínu hverfi og fara svo með sínum vinum í Öldutúnsskóla?

Foreldrar barna í Kató sendu fyrirspurn um hvað yrði um leikskólann síðastliðið vor en ekkert bólar á svari. Sú fyrirspurn var ítrekuð nú í haust en enn bólar ekki á svari. Það hefur hvarflað að manni að stefnan sé hreinlega að bola barnafjölskyldum úr Hafnarfirði, þessar tillögur styðja enn frekar undir þær vangaveltur.  Fólkið hér í hverfinu vill og á að hafa aðgang að grunnþjónustu innan hverfis.

Ég tel að ykkar von um að koma Hafnarfirði í fremstu röð sé úti með þessum tillögum, nema auðvitað að fremsta röð þýði barnlaus bær.