Öruggt hjá Barcelona

Guðjón Valur Sigurðsson skoraði þrjú mörk í enn einum stórsigri Barcelona í spænsku úrvalsdeildinni í handbolta. Í kvöld voru fórnarlömbin Adelma en leiknum lyktaði með níu marka sigri Börsunga, 28-37.

Barcelona hefur unnið alla sex leiki sína á tímabilinu og situr á toppi spænsku deildarinnar með 12 stig, tveimur stigum meira en Granollers og La Rioja.

Guðjón Valur skoraði sem áður sagði þrjú mörk í leiknum en Kiril Lazarov var markahæstur í liði Börsunga með níu mörk úr aðeins 10 skotum.

Franski línumaðurinn Cedric Sorhaindo kom næstur með fjögur mörk en allir útileikmenn Barcelona nema tveir komust á blað í kvöld.