Dómurinn yfir Sigga hakkara: Bauð unglingspiltum allt að 100 milljónir, bíla og ein­býlis­hús

Sigurður Ingi Þórðarson, eða Siggi hakkari, þarf að greiða níu piltum, sem hann braut á á árunum 2011-2013, alls 8,6 milljónir króna í miskabætur. Um er að ræða tæplega sjötíu brot gegn piltunum, sem allir voru á unglingsárum þegar brotin áttu sér stað, þar af fjörutíu gegn einum þeirra.

Bauð gull og græna skóga

Sigurður bauð drengjunum himinháar peningagreiðslur, bíla, hús, tölvur, farsíma,  gjafabréf og annars konar vilyrði fyrir kynmökin. Hann bauð peningagreiðslur frá nokkrum tugum þúsunda, allt upp í eitt hundrað milljónir króna. Peningana greiddi hann ekki en sveik þess í stað út fé frá að minnsta kosti einum dreng. Þá lofaði hann nokkrum þeirra að hann skyldi hakka sig inn í tölvukerfi skóla þeirra til að laga einkunnir þeirra og mætingu.

Samskipti Sigurðar áttu sér flest stað í gegnum Facebook og fékk hann drengina til að hitta sig með því að telja þeim trú um að þeir fengju eitthvað í staðinn. Einum drengnum bauð hann tuttugu og fimm milljónir króna og bifreið, gegn því að drengurinn hefði við sig munnmök.

Þrátt fyrir að pilturinn hefði neitað lét Sigurður sér ekki segjast því degi síðar bauðst hann til að greiða utanlandsferð fyrir piltinn og vini hans, gegn því að pilturinn léti karlmann hafa við sig munnmök, líkt og það er orðað í dómnum. Sigurður hélt áfram að áreita drenginn, áréttaði boð sitt um milljónirnar tuttugu og fimm, bauð honum að gerast hjá sér starfsmaður og sagðist geta breytt einkunnum hans. Um það bil mánuði síðar, eða hinn 4. desember 2012, samþykkti drengurinn að hitta Sigurð og óku þeir saman að hitaveitulögn þar sem Sigurður braut á drengnum.

Sigurður gerði ítrekaðar tilraunir til að tæla drenginn með blekkingum til kynferðismaka, með því að telja honum trú um að hann fengi háar fjárhæðir og bifreið að launum.

Lofaði að margfalda upphæðirnar

Á jóladag árið 2012 sagðist Sigurður reiðubúinn til að margfalda upphæðirnar, gegn því að hann fengi aftur að hafa munnmök við piltinn. Hann bauðst til að bæta við 100 milljónum króna og Land Rover bifreið, gegn því að þeir myndu hittast þetta sama kvöld. Þá bauð Sigurður 200 þúsund krónur til viðbótar og hús, gegn endaþarmsmökum. Þannig héldu vilyrðin áfram eða allt til aprílmánaðar 2013.

Á þessum sama tíma var Sigurður í samskiptum við fleiri drengi. Hinn 30. janúar 2013 bauð hann öðrum dreng bifreið að eigin vali, að upphæð 25-30 milljónum króna, gegn því að drengurinnn hefði við sig kynferðismök. Þá sagðist hann geta gert við hann starfssamning þar sem hann fengi tíu milljónir króna í laun á mánuði. Hann sagði drengnum jafnframt að hann skyldi opna bankareikning erlendis fyrir þangað sem greiðslurnar færu, en að hann þyrfti 120 þúsund krónur til að geta stofnað reikninginn. Vegna loforða Sigurðar lagði drengurinn inn á reikning hans fimmtíu þúsund krónur, en reikninginn stofnaði Sigurður aldrei.

Sakhæfur en siðblindur

Sem fyrr segir braut Sigurður gegn níu drengjum, fimmtán sinnum gegn einum þeirra og fjörutíu sinnum gegn öðrum.  Hann játaði brotin á var dæmdur í þriggja ára fangelsi í Héraðsdómi Reykjaness í gær.

Farið var fram á mat geðlæknis í málinu, sem mat það sem svo að Sigurður væri sakhæfur en siðblindur. Hann uppylli örugglega skilmerki fyrir persónuleikaröskun af andfélagslegri gerð. Hann þekki mun á réttu og röngu en „missi sig“ verði hann fyrir vonbrigðum. Um sé að ræða persónuleikaveilu.

Sigurður var í febrúar í fyrra dæmdur í átta mánaða fangelsi fyrir kynferðisbrot gegn sautján ára dreng. Níu mánuðum síðar var hann dæmdur í tveggja ára óskilorðsbundið fangelsi fyrir fjársvik.

Sigurður byrjaði að hakka tölvur í kringum tólf ára aldur og starfaði síðar með Julian Assange og félögum í Wikileaks. Hann komst í heimspressuna þegar samvinna hans og Assange lauk með því að sá síðarnefndi sakaði hann um að hafa dregið að sér fé sem átti að renna til samtakanna.

Dóminn má lesa hér.