Ætla að bregðast við athugasemdum gæðaráðs fyrir miðjan nóvember

„Við stefnum á að vera búin að koma þessu í lag um miðjan nóvember,“ segir Vilhjálmur Egilsson, rektor Háskólans á Bifröst, um þær athugasemdir sem Gæðaráð íslenskra háskóla gerir í úttekt sinni. Ráðið segist bera takmarkað traust til þess að skólinn geti tryggt gæði prófgráða.

Athugasemdir ráðsins lúta eru af ýmsum toga. Snúa þær meðal annars aðtakmarkaðri notkun skólans á tölfræðilegum upplýsingum, skorti á kennurum með doktorsgráðu og að ráðningar hafi ekki verið nógu faglegar.

Vilhjálmur fagnar úttekt ráðsins enda segir hann mikilvægt að fá úttekt sem bendi á kosti og lesti skólans. Það sé gott fyrir skóla sem vilji vaxa og dafna. Skólinn ætli að ljúka þeim fyrir miðjan nóvember og skila nýrri skýrslu í kjölfarið.

„Sum þessara mála eru kannski þess eðlis að það er ekki hægt að klára þau en önnur munum við klára.“ 

Þegar hafi verið fundað með ráðinu sem segist spennt að fylgjast með þeim breytingum og bótum sem skólinn ætli að legggjast í. „Við getum lagað þetta allt saman,“ segir Vilhjálmur. Hann segir horfur til framtíðar ágætar. Til að mynda hafi gæðaráðið í fyrstu sagst bera takmarkað traust til skólans til framtíðar en það hafi verið dregið til baka eftir athugasemdir skólans.

Sem fyrr segir ætla Vilhjálmur og félagar á Bifröst að bregðast við athugasemdunum. Hann segir þær mega að miklu rekja til að nemendurnir séu í forgangi.

„Maður er á kafi að hugsa um nemendurna en svo er skrifborðið kannski ekki hreint,“ segir rektorinn og vísar til þeirrar skriffinnskuvinnu sem athugasemdir ráðsins snúa að miklu leyti að.

Leita að lendingu hjá HÍ

Á sjöunda hundrað nemendur nema við skólann í ár og hafa ekki verið fleiri frá árinu 2007 að sögn Vilhjálms. Nemendurnir á háskólastigi skiptast á milli viðskipafræði-, lögfræði- og félagsfræðideildar. Þá er einnig háskólagáttin sem um hundrað nemendur fara í gegnum á ári hverju.

„Um helmingur kemur í háskólanám til okkar og helmingur fer í aðra háskóla,“ segir Vilhjálmur. Nemendum hafi gengið ágætlega að fá próf sitt metið til inngöngu í aðra háskóla.

„Að frátöldum Háskóla Íslands af einhverjum ástæðum. Við erum að reyna að ná lendingu með Háskóla Íslands um hvernig þetta eigi að vera.“

Skýrslu Gæðaráðs háskóla á Íslandi