„Þeir klúðruðu bara löggan enn og aftur“

„Þeir klúðruðu bara löggan enn og aftur,“ segir Ásdís Hrönn Viðarsdóttir um niðurstöðu Héraðsdóms Norðurlands eystra sem ákvað að vísa nálgunarbannskröfu Ásdísar gegn fyrrverandi sambýlismanni sínum frá dómi.

Fréttastofa Ríkisútvarpsins greinir frá því að nálgunarbanninu hefði verið vísað frá því lögreglustjórinn á Norðurlandi eystra virti ekki tímafresti þegar hann fór fram á nálgunarbannið. Ásdís óskaðir eftir því að maðurinn yrði látinn sæta nálgunarbann 7. júlí síðastliðinn en lögreglustjórinn fór ekki fram á bannið fyrr en rúmum mánuði síðar.

Lögreglustjóri þarf að taka ákvörðun um nálgunarbann eigi síðar en sólarhring eftir að beiðni frá brotaþola hefur borist.

„Þetta er orðið eitt allsherjar grín,“ segir Ásdís Hrönn sem hefur ítrekað kært hótanir og brot á nálgunarbanni sem sett var á fyrrverandi sambýlismann hennar, fyrst árið 2012. Hún segist ætla að fara strax aftur fram á nálgunarbann. „Því hann er ekkert að hætta þessi maður. Eina vörnin mín er að ég bý ekki í nágrenni við hann. Hann getur ekki látið mig í friði þar sem ég er 700 kílómetra í burtu. Það er hann sem hefur ákveðið mitt líf, hvar ég bý og annar staðar því hann kemst upp með allt.“

Ásdís og maðurinn bjuggu saman í um tíu mánuði árið 2011 og eftir að samvistum lauk hefur hann meira og minna ofsótt hana.

Ásdís sagði sögu sína í Kastljósi í fyrra og lagði þar áherslu á að nálgunarbann væri fullkomlega gagnslaust þegar lögregla brygðist ekki við því þegar það væri brotið.

Hún var í viðtali við Fréttablaðið nýverið sem lesa má hér.