Fannar: Tek enga áhættu með barn á leiðinni

„Þetta lið sýndi mér áhuga í lok maí en svo gerðist ekkert í langan tíma. Svo núna bara í vikunni datt það aftur inn og þá gerðust hlutirnir mjög hratt. Þetta er bara ágætis lending.“

Þetta segir handknattleiksmaðurinn Fannar Friðgeirsson í samtali við Vísi um aðdragandann að vistaskiptum sínum til Eintracht Hagen sem spilar sem nýliði í þýsku B-deildinni næsta vetur.

Fannar hefur spilað með Grosswallstadt undanfarin tvö ár, en félagið varð gjaldþrota á dögunum og þarf að byrja upp á nýtt í C-deildinni.

Á von á sínu fyrsta barni

Í viðtali við Vísi á dögunum sagðist Fannar hafa lifað á sparnaðinum undanfarna mánuði þar sem enginn fékk borgað hjá Grosswallstadt, en hann gat ekki leikið sér mikið á markaðnum núna vegna fjölskylduaðstæðna.

„Staðan er þannig hjá mér núna að ég á von á mínu fyrsta barni með konunni minni í ágúst. Gjaldþrotið kom auðvitað á slæmum tíma þar sem 70-80 prósent af liðunum í efstu og næst efstu deild eru búin að ganga frá sínum leikmannamálum. Það voru lið sem spurðust fyrir um mig en þau höfðu minni peninga milli handanna,“ segir Fannar við Vísi.

„Þetta lið komst upp í B-deildina í gegnum umspil og gat því ekkert farið af stað í leikmannamálum fyrr en eftir að það vissi í hvaða deild það yrði. Hagen fór því seint af stað og ég líka þannig við pössuðum ágætlega saman.“

„Maður tekur engar áhættur með barn á leiðinni. Ég get ekkert beðið og vonast eftir að einhver slíti krossband í haust og taki mig þá í staðinn. Fjölskyldan er í fyrsta sæti og það svona ýtti manni af stað í þessu. Væri ég einhleypur og barnlaus hefði ég kannski tekið meiri áhættu en ekki eins og staðan er núna.“

Með góða nágranna

Eintracht Hagen ætlar sér ekki bara að halda sæti sínu í B-deildinni heldur er stefnan á að gera betri hluti og enn betri á næstu árum.

„Tveir liðsfélagar mínir úr Grosswallstadt koma líka. Þeir skrifa bara undir í vikunni. Svo hefur liðið fengið fleiri ágætis leikmenn til sín sem ég hef spilað með og á móti þannig ég trúi ekki öðru en við verðum í fínum málum,“ segir Fannar, en hann viðurkennir að hann sé að renna blint í sjóinn.

„Þetta er alveg óskrifað blað fyrir mig. Ég hef aldrei spilað við þetta lið. Ég veit bara að þeir hafa fengið góða leikmenn og kynntu fyrir mér framtíðarplanið sem hljómaði vel. Ég er með svipaðan samning og hjá Grosswallstadt líka þannig ég er bara sáttur.“

Fannar þarf að flytja í nýjan bæ eins og gerist og gengur þegar menn skipta um lið, en Hagen er í um tveggja tíma fjarlægð frá núverandi heimili hans. Hann verður þó með góða nágranna.

„Ég verð í næsta bæ við Arnór og Björgvin Páll í Bergischer og svo er Gunnar Steinn þarna líka. Þetta er allt við Köln,“ segir Fannar Þór Friðgeirsson.