Bað mennina um að koma eiginmanni sínum fyrir kattarnef

Joyce Mitchell, sem er grunuð um að hafa aðstoðað tvo hættu­lega fanga að flýja fang­elsi í New York, er sögð hafa beðið menninna um að ráða eiginmann hennar af dögum. Mennirnir hafa nú gengið lausir í 12 sólarhringa.

Mitchell var handtekin í liðinni viku í tengslum við flótta glæpmannanna tveggja, þeirra Richard Matt og David Sweat. Konan starfaði sem saumakona í fangelsinu og er talið að hún hafi liðsinnt mönnunum með því að smygla til þeirra verkfærum inni í fangelsið.

Mennirnir eru taldir mjög hættulegir og hafa hundrað þúsund dalir verið settir til höfuðs þeim. Þeir eru sagðir líklegir til að fremja ódæðisverk á ný en þeir sitja báðir inni fyrir morð.

Sjá einnig: Tveir dæmdir morðingjar sluppu úr hámarksöryggisfangelsi

Rannsóknarmenn hafa gefið í skyn að Mitchell hafi verið heilluð af öðrum fanganum og samþykkt að sækja mennina þegar þær væru komnir út fyrir veggi fangelsisins.

Saksóknarinn í málinu heldur því fram í samtali við þarlenda fjölmiðla að konan hafi beðið mennina um að myrða eiginmann sinn, sem einnig vann í fangelsinu. Lögmaður konunnar segir að henni hafi þó snúist hugur og hafi sagt manni sínum frá ráðabrugginu.

Tveimur sögum fer af því hvort eiginmaður hennar muni styðja hana í réttarhöldunum sem hún á í vændum sér vegna aðildar hennar að flóttanum.

Mitchell hefur verið rannsökuð af yfirvöldum síðasta árið vegna sambands hennar og Richard Matt en þau kynntust þegar þau unnu bæði á saumastofu fangelsisins. Ekki voru næg sönnunargögn til þess að bregðast við meintu sambandi þeirra en Matt fékk ekki að starfa á saumastofunni áfram.

Sweat var dæmdur til lífstíðarfangelsis án möguleika á reynslulausn eftir að hann var dæmdur fyrir morð á lögreglumanni í júlí árið 2002. Matt fékk hins vegar frá 25 árum til lífstíðarfangelsisvistar. Hann var dæmdur fyrir þrjú morð, þrjú mannrán og tvö rán eftir að hann rændi manni og barði hann til dauða í desember árið 1997.

Ríkisstjórinn New York Andrew Cuomo hefur sett hundrað þúsund dollarar til höfuðs þeim enda séu þeir afar hættulegir og líklegir til þess að fremja ódæðisverk á ný.