Hundrað þúsund máltíðir í ruslið fáist ekki leyfi til slátrunar

Svínaræktandinn Síld og fiskur segist ætla að aflífa hundruð grísa og henda kjöti sem myndi duga í um það bil hundrað þúsund máltíðir, fái fyrirtækið ekki undanþágu til slátrunar í dag.

Framkvæmdastjóri fyrirtækisins segir ástandið á búinu orðið mjög slæmt og að ekki verði beðið lengur með slátrun. Þetta kemur fram í Morgunblaðinu í dag.

Fyrirtækið hefur ekki viljað gangast við skilmálum Dýralæknafélagsins að skila inn yfirlýsingu um að kjöt fari ekki á markað, gegn því að undanþága til slátrunar sé veitt.

Sigríður Gísladóttir, formaður dýralækna segir í samtali við blaðið að fyrirtækið hafi farið fram af hörku í málinu og gerir hún ráð fyrir því að undanþágubeiðninni verði hafnað.