Prinsessa fædd í London

Katrín, hertogaynja af Cambridge, fæddi í morgun stúlkubarn á St Mary's spítalanum í London. Barnið kom í heiminn um klukkan hálfníu og var 15 merkur.

Vilhjálmur prins var viðstaddur fæðinguna og heilsast bæði móður og barni vel að því er kemur fram í tilkynningu frá bresku konungsfjölskyldunni.

Prinsessan er sú fjórða í röðinni til að erfa bresku krúnuna, á eftir afa sínum, Karli Bretaprins, pabba og bróður, Georgi prins.

Tveir lögregluþjónar gæta nú dyranna að Lindo-væng spítalans þar sem Katrín átti stúlkuna. Þá er fjöldi fjölmiðlamanna samankominn við spítalann auk aðdáenda konungsfjölskyldunnar sem bíða í ofvæni eftir nýjasta fjölskyldumeðlimnum.