Gengi bréfa í Marel rýkur upp

Gengi bréfa í Marel hefur hækkað um 7,05 prósent í morgun í 629 milljóna króna viðskiptum. Stendur gengið núna í 167 krónum á hlut.

Marel sendi tilkynningu í kauphöll Íslands í morgun þess efnis að afkoma félagsins væri umfram væntingar á fyrsta fjórðungi, en uppgjör verður birt eftir lokun markað þann 29. apríl. Mat stjórnenda byggist einkum á auknum tekjum, hagstæðri tekjudreifingu og aukinni skilvirkni í rekstri félagsins.

Mótteknar pantanir í fjórðungnum eru áætlaðar 212 milljónir evra. Tekjur fjórðungsins verða um 209 milljónir evra, með leiðréttan rekstrarhagnað* (adjusted EBIT) yfir 11% af tekjum og rekstrarhagnað (EBIT) tæplega 8% af tekjum. Hagnaður eftir skatt í fyrsta ársfjórðungi er áætlaður rúmlega 12 milljónir evra.

Í tilkynningu segir að góður meðbyr sé á helstu mörkuðum Marel og skilyrði á fjármálamörkuðum hagstæð. Þó er vakin athygli á því að uppgjör félagsins geta breyst milli fjórðunga vegna almennrar þróunar í efnahagsmálum og sveiflum í tekjum og tekjusamsetningu.