Egill og Páll lýstu leiknum saman: „Hérna, fáðu þér sleikjó“

Chelsea og Manchester United áttust við í ensku úrvalsdeildinni um helgina en leiknum lauk með 1-0 sigri Chelsea þrátt fyrir að Rauðu djöflarnir hefðu haft boltann bróðurpartinn úr leiknum. Egill Einarsson, stuðningsmaður Man Utd, og Páll Magnússon, stuðningsmaður Chelsea, horfðu saman á leikinn og lýstu honum hvor með sínu nefi.

„Hérna. Fáðu þér sleikjó. Ég ætla að gefa þér sleikjó í hvert skipti sem Chelsea skorar,“ sagði Páll Magnússon eftir að Eden Hazard skoraði. „Ég kom að vísu bara með fjóra svo þú verður að láta það duga.“

Hápunktar lýsingar félaganna voru sýndir í Ísland í dag og má einnig sjá hér í fréttinni.