Aðstoða fátæka námsmenn við áfengiskaupin

Á vefsíðunni Buzzy.is má sjá hvað hver millilítri af alkóhóli kostar í þeim áfengu drykkjum sem fást í Vínbúðinni.

Ásgeir Björnsson, sem setti vefinn á laggirnar ásamt félögum sínum, segir í samtali við Nútímann að hugmyndin hafi kviknað þegar hann var í háskólanum. Hann hafi, eins og flestir stúdentar, ekki átt mikinn pening.  

„Þá fór maður aðeins að spá í því hvað peningurinn færi í í vínbúðinni svo að maður væri ekki að eyða í óþarflega dýran bjór miðað við áfengisinnihaldið. Markhópurinn er því eiginlega fátækir námsmenn.“

Í mars tóku Ásgeir og þrír vinnufélagar hans þátt í nýsköpunarmaraþoni og ákváðu þá að kýla á hugmyndina.

Á síðunni kemur meðal annars fram að hvítvínið Crocodile Creek Chardonnay sé hagstæðasta léttvínið hvað varðar verð og alkóhólmagn. Hagstæðasti bjórinn er Egils Pilsner og hagstæðasta sterka áfengið er Tinda Vodka.