Hæstiréttur hafnar kröfu Sigurjóns Árnasonar

Hæstiréttur Íslands hefur hafnað kröfu Sigurjóns Árnasonar, fyrrverandi bankastjóra Landsbankans, um að dómari við Héraðsdóm Reykjavíkur þurfi að víkja vegna vanhæfis.

Slitabú Landsbankans hefur stefnt Sigurjóni vegna 35 milljóna séreignarsparnaðargreiðslu sem Landsbankinn greiddi Sigurjóni í vikunni áður en bankinn féll, í október 2008. Slitabú gamla Landsbankans vill fá milljónirnar 35 endurgreiddar, auk dráttarvaxta.

Sigurjón fór fram á að héraðsdómari í málinu myndi víkja vegna þess að eiginmaður hennar leigir skrifstofu í húsnæði sem Kristinn Bjarnason, lögmaður slitabúsins, á með þrem öðrum. Þar eru leigðar út skrifstofur fyrir yfir 20 lögfræðinga. Fullyrt var að slíkar aðstæður væru til þess fallnar að draga mætti óhlutdrægni dómarans í efa.

Þessu hafnaði héraðsdómur fyrst og nú hefur Hæstiréttur staðfest dóm héraðsdóms.

Frávísunarkrafa sett fram kvöldið fyrir aðalmeðferð

Þá telur héraðsdómur aðfinnsluvert að krafan um að dómari viki hafi ekki verið sett fyrr fram. Farið var fram á að dómari viki með tölvupósti sem sendur var klukkan 21:38 kvöldið áður en aðalmeðferð málsins átti að hefjast, klukkan 9:30 næsta dag. Héraðsdómur bendir á að aðalmeðferð hafi verið ákveðin með löngum fyrirvara.



Dóma Hæstaréttar og hérðasdóms má lesa í heild sinni hér.