Viðskipti innlent

Sigurjón dæmdur í tólf mánaða fangelsi

Sunna Karen Sigurþórsdóttir skrifar
Sigurjón Árnason ásamt lögmanni sínum Sigurði G. Guðjónssyni.
Sigurjón Árnason ásamt lögmanni sínum Sigurði G. Guðjónssyni. Vísir/Vilhelm
Sigurjón Þ. Árnason, fyrrum bankastjóri Landsbankans, var dæmdur í tólf mánaða fangelsi í Héraðsdómi Reykjavíkur í dag. Þar af eru níu mánuðir skilorðsbundnir til tveggja ára. Sá tími sem Sigurjón var í gæsluvarðhaldi vegna málsins dregst frá dómnum. Tveir starfsmenn bankans, Ívar Guðjónsson og Júlíus Steinar Heiðarsson, fengu níu mánaða dóm en þar af eru sex mánuðir á skilorði til tveggja ára. Sindri Sveinsson, annar starfsmaður bankans, var sýknaður af kröfu sérstaks saksóknara. Málsvarnarlaun Sigurjóns skulu greidd af hálfu úr ríkissjóði, alls 39.075.680 krónur, og málsvarnarlaun Ívars sömuleiðis, alls 43.950.000 krónur. Ákærðu voru ekki viðstaddir dómsuppkvaðningu klukkan tíu í morgun. 

Lögmenn mannanna fjögurra í Héraðsdómi Reykjavíkur í dag. Vísir/Ernir
Málið sem um ræðir er eitt það stærsta sem sérstakur saksóknari hefur haft til rannsóknar í kjölfar efnahagshrunsins. Sigurjóni, Ívari, Sindra og Júlíusi var gefið að sök að hafa blekkt almenning með því að handstýra verði hlutabréfa í bankanum í aðdraganda hrunsins. Í ákærunni segir að með háttsemi þeirra hafi þeir raskað þeim forsendum og lögmálum sem liggja að baki eðlilegri verðmyndun á skipulegum verðbréfamarkaði með því að auka seljanleika hlutabréfa í Landsbankanum með ólögmætum hætti. Aðalmeðferð málsins tók á aðra viku.

Þetta er síðara málið af tveimur í ákærunni sem skipt var upp vegna umfangs þess. Sigurjón var sýknaður í Ímon-málinu svofnefnda og er þetta því fyrsta sakfelling Sigurjóns.

Sigurjón og Elín Sigfúsdóttir voru sýknuð af ákæru um umboðssvik í Ímon-málinu svokallaða en Steinþór Gunnarsson, sem gegndi stöðu forstöðumanns verðbréfamiðlunar bankans, var hins vegar dæmdur í níu mánaða fangelsi þar af hálft ár skilorðsbundið.  Þá voru þau Sigurjón og Elín í október sýknuð af ákæru um umboðssvik í Panama-málinu svokallaða vegna sjálfskuldarábyrgða sem Landsbankinn gekkst í vegna hlutabréfakaupa í bankanum. Því hefur sérstakur saksóknari áfrýjað til Hæstaréttar.


Tengdar fréttir

Björgólfsfeðgar bera vitni

Vitnaleiðslur hefjast í dag í Héraðsdómi Reykjavíkur í máli Sérstaks saksóknara gegn Sigurjóni Þ. Árnasyni, fyrrverandi bankastjóra Landsbankans, og þremur undirmönnum hans.

Ósáttur við að vera kallaður til sem vitni

Steinþór Gunnarsson, fyrrverandi forstöðumaður verðbréfamiðlunar Landsbankans, baðst undan því að bera vitni í Héraðsdómi Reykjavíkur í dag í markaðsmisknotkunarmáli bankans.

Þvertók fyrir að hafa haft áhrif á hlutabréfaverð

Björgólfur Thor Björgólfsson, stærsti eigandi Landsbankans fyrir hrun, kvaðst fyrir Héraðsdómi í dag hafa rætt hvernig ætti að bregðast við óveðri en ekki hvernig ætti að hafa áhrif á veðrið.






Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.