Skera niður Xbox til þess að spreða í gervigreind

Kjartan Kjartansson skrifar 6. júlí 2026 14:32

Xbox er einn af risunum á leikjatölvumarkaði. Hallað hefur undan fæti hjá fyrirtækinu að undanförnu og nú taka við umfangsmiklar uppsagnir á starfsfólki. Vísir/EPA

Tæknirisinn Microsoft tilkynnti að fimmtungi starfsmanna við Xbox-leikjatölvudeild hans yrði sagt upp störfum. Alls var tveimur prósentum starfsliðs Microsoft sagt upp en fyrirtækið eys nú fúlgum fjár í þróun gervigreindar.

Um 1.600 starfsmönnum Xbox verður sagt upp strax og 1.250 til viðbótar næsta árið. Í heildina verður 4.800 manns sagt upp störfum hjá Microsoft, að því er kemur fram í frétt New York Times.

Niðurskurðurinn nær einnig til leikjaframleiðenda í eigu Xbox, þar á meðal Activision Blizzard sem er þekktast fyrir leikjaraðirnar Call of Duty og Warcraft. Önnur stúdíó verða seld út úr Xbox. Óvíst er um framtíð Arkane Studios sem er þekktast fyrir Dishonored-leikina.

Xbox hafði varið milljörðum dollara í að kaupa leikjaframleiðlendur á undanförnum árum, þar á meðal Activision Blizzard fyrir 69 milljarða dollara árið 2023.

Veldi leikjatölvuframleiðandans sögufræga hefur hins vegar hnignað á undanförnum árum og tap verið á rekstri dótturfélaga hans. Á sama tíma hefur gervigreindarkapphlaupið, sem Microsoft er stórtækur þátttakandi í, stóraukið eftirspurn eftir íhlutum eins og minniskortum og keyrt upp verð.

Microsoft greindi frá því í vor að fyrirtækið ætlaði sér að verja um 190 milljörðum dollara í gagnaver og aðra innviði fyrir gervigreind á ári. Á sama tíma hefur það fækkað starfsfólki verulega líkt og fleiri tæknifyrirtæki hafa gert.

Leikjavísir Microsoft Gervigreind