Níu vikna barn heyrir í fyrsta skipti

Elijah Cook fæddist 2. janúar í Minnesota en stuttu síðar kom í ljós að hann var heyrnarlaus á öðru eyra og næstum því á hinu eyranu. Móðir hans, Ahavah Cook, hélt að hún myndi aldrei heyra hann hjala og hlæja. Níu vikum síðar með hjálp læknavísindanna fékk Elijah að heyra rödd móður sinnar í fyrsta sinn og var fallega augnablikið tekið upp á myndband. Barnið blikkar augunum þegar móðirin talar við hann og er hissa á svipinn. Augnablikið má sjá hér neðar í fréttinni.

„Í fyrsta skiptið sem ég sá hann blikka augunum fann ég fyrir öldu af tilfinningum,“ sagði Ahavah Cook í bloggi um myndbandið. „Ég var að reyna að halda aftur af tárunum. Ég vildi ekki að hann myndi sjá mig gráta. Ég var að reyna að vera róleg og bara tala við hann.“

Síðan myndbandið var tekið upp hefur Elijah hjalað, brosað og brugðist við hljóðum frá fjölskyldu sinni. „Þetta með hjalið er stærsta breytingin,“ sagði Jason Cook, faðir Elijah. „Áður var hann ekki mjög mikið fyrir að tala en síðan hann fékk heyrnartækið þá hjalar hann meira og fylgist betur með.“ 

Elijah á að öllum líkindum við heyrnarvandamál að stríða vegna þess að í bæði í móður- og föðurfjölskyldu hans eru heyrnardaufir einstaklingar. Foreldrar hans vonuðust þó til þess að hann myndi fæðast með fulla heyrn þar sem frændur hans og frænkur erfðu ekki heyrnarleysið. 

Lesa má meira um sögu Elijah hér.