Þrjár vikur síðan Flosi hvarf: „Rífur úr manni hjartað“

Tæpar þrjár vikur eru síðan hundurinn Flosi hvarf frá bænum Ós í Arnarneshreppi í Eyjafirði. Fjölmargir hafa leitað Flosa, meðal annars leitarhundar, en þrátt fyrir það hefur hvorki tangur né tetur fundist.

„Það er búið að fara í gegnum skóglendi og búið að ganga þetta svæði alveg fram og til baka. Bændur eru búnir að fara inn í öll sín hús og hafa fylgst með háttalagi hrafna en segja að það liggi ekkert dautt þarna úti. Leitarhundarnir hefðu líka átt að finna lykt ef hann væri dauður á svæðinu,“ segir Harpa Jörundardóttir, eigandi Flosa.

Flosi er nítján mánaða Bichon Frise rakki. Hann er örmerktur og afar ljúfur í umgengni, að sögn Hörpu. „Hann kemur úr ofboðslega vernduðu umhverfi, aldrei farið út nema bundinn og ef hann hefur orðið hræddur þá veit ég ekki hvernig hann myndi bregðast við því, því ég hef aldrei séð hann hræddan,“ segir hún.

Gefast ekki upp

Hörpu grunar að hugsanlega hafi einhver keyrt yfir hundinn eða jafnvel tekið hann upp í bíl hjá sér og viti ekki að hans sé saknað. „Það er samt aldrei hægt að vita hvað hefur komið fyrir. En þetta er búið að vera mjög erfitt fyrir alla aðila, strákurinn minn sem er 15 ára keypti hundinn fyrir sinn pening og er tjónið því bæði gríðarlega andlegt og fjárhagslegt fyrir hann.“

Harpa og sonur hennar ætla þó ekki að gefast upp. Hún segir Flosa einn þeirra besta vin og hluta af fjölskyldunni og biður hún því alla þá sem telja sig hafa vitneskju um farir Flosa að hafa samband við lögreglu eða hana sjálfa í síma 846-6977.

„Þetta er orðinn svo ofboðslega langur tími. Þetta alveg rífur úr manni hjartað,“ segir hún að lokum.

Þetta myndband var tekið nokkrum dögum áður en litli hnoðrinn okkar hreinlega hvarf út í nóttina - það sem ég vildi óska að hann færi að koma í leitirnar.

Posted by Harpa Jörundardóttir on 27. mars 2015

Nú erum við búin að leita í 12 daga á svæðinu þar sem hann Flosi okkar hvarf (frá bænum Ós í Arnarneshreppi í Eyjafirði)...

Posted by Harpa Jörundardóttir on 22. mars 2015