Byrjaði í Biggest Winner á bolludaginn: „Hundrað kílóum léttari á sálinni“

„Ég er aftur orðin þátttakandi í lífinu en ekki áhorfandi,“ segir kona sem hafði ekki hreyft sig í mörg ár og getur í dag gert hluti sem hana óraði ekki fyrir að geta framkvæmt fyrir ári. Hún kynntist hópi sem er sérstaklega fyrir feita, flotta og frábæra og kallar sig Biggest Winner.

Undanfarið ár hefur hópurinn unnið að því að rífa sig upp úr sófanum og breyta lífi sínu með því að koma sér af stað í hreyfingu á nýjan leik. Ferðafélag Íslands fór af stað með verkefnið í fyrra og á einu ári eru meðlimirnir búnir að umturna sínu lífi til betri vegar. Tónlistarkonan Ingibjörg Sigurrós Gunnarsdóttir er ein þeirra.

„Ég var að nálgast 140 kíló, ég var með sykursýki og ég var með síþreytu. Nánast daglega var bara streð að sinna daglegum störfum. Sjálfsálit og sjálfstraust var algjörlega í molum því þegar manni líður svona illa og það er engin leið út úr þessu að þá er maður bara á vondum stað,“ segir Ingibjörg.

Hún lýsir því sem svo að hún hafi verið komin á botninn líkamlega og andlega.

„Ég var alveg búin að gefast upp á öllu en svo fann maðurinn minn auglýsingu í blaðinu um Biggest Winner. Svo ég fór í smá svona kynningarviðtal á bolludaginn í fyrra, sem er dálítið lýsandi fyrir hópinn, því við tökum okkur ekki alvarlega.“

Þetta varð upphafið að miklum breytingum í lífi Ingibjargar.

„Í dag er ég mörgum kílóum léttari en ég er sko hundrað kílóum léttari á sálinni þannig að það er bara eins og það sé búið að draga frá.“

Innslagið um Biggest Winner úr Íslandi í dag má sjá í heild sinni hér að neðan.