Vildu gera vel við sig á Ibiza

Franskir fjölmiðlar hafa undir höndum gögn saksóknara þar í landi fyrir málarekstur þess gegn Nikola Karabatic og fleiri handboltamönnum sem gefið er að sök að hafa hagrætt úrslitum leiks Montpellier og Cesson-Rennes í maí árið 2012.

Málið vakti gríðarlega athygli á sínum tíma og miðað við gögnin er rannsókn franskra yfirvalda umfangsmikil. Franska blaðið L'Equipe segir að fjölmargir leikmenn Montpellier liggi undir grun um að hafa tapað viljandi fyrir Cesson-Rennes og grætt á því samtals 255 þúsund evrur - um 38 milljónir króna samkvæmt núgildandi gengi.

Serbneska skyttan Mladen Bojinovic er sagður vera í aðalhlutverki í málinu en hann var búinn að vera á mála hjá Montpellier í áratug þegar málið kom upp. Stuttu síðar yfirgaf hann félagið og samdi við PSG, þar sem hann er enn í dag. Gengur saksóknari svo langt að fullyrða að Bojinovic hafi glímt við spilafíkn.

Bojinovic mun hafa gefið grænt ljóst á aðgerðina sem svo fleiri leikmenn tóku þátt í - meðal þeirra frönsku landsliðsmennirnir og bræðurnir Nikola og Luka Karabatic, sem og Samuel Honrubia.

Karabatic-bræður hafa ávallt neitað sök en saksóknarar virðast sannfærðir um sök þeirra sem og annarra leikmanna félagsins. Nikola Karabatic tók út 1500 evrur af reikningi sínum fáeinum dögum fyrir leikinn og hefur kærasta hans viðurkennt að hún hafi fengið fyrirmæli frá honum um að taka við peningnum og veðja á úrslit hans. Var þetta eina úttekt Karabatic yfir margra mánaða tímabil.

Yfirvöld í Frakklandi telja að ein möguleg ástæða fyrir veðmálbraskinu væri að leikmenn vildu gera vel við sig í ferð til Ibiza á Spáni í lok tímabilsins. SMS-samskipti Luka Karabatic og kærustu hans virðast renna stoðum undir þær grunsemdir.

Enn fremur er því haldið fram að þessi aðgerð hafi verið ómöguleg án vitneskju og þátttöku flestra ef ekki allra leikmanna í liðinu og því deili margir sök í málinu. Búist er við að réttarhöld í málinu hefjist á miðju þessu ári.