Haukur Helgi og félagar töpuðu á flautukörfu

Haukur Helgi Pálsson og félagar hans í LF Basket töpuðu á grátlegan hátt fyrir KFUM Nässjö, 64-63, á heimavelli í sænsku úrvalsdeildinni í körfubolta í kvöld.

Heimamenn voru einu stigi yfir þegar KFUM-liðið fór í lokasóknina, en það brenndi af sniðskoti þegar tvær sekúndur voru eftir. Því miður fyrir LF Basket náði leikmaður gestanna að pota boltanum ofan í með frákastinu og tryggði þeim sigurinn um leið og flautan gall.

Haukur Helgi skoraði 10 stig, tók 7 fráköst og gaf 3 stoðsendingar fyrir LF Basket sem var búið að vinna fjóra leiki í röð fyrir tapið í kvöld.

Fimm leikja sigurgöngu Drekanna í Sundsvall lauk einnig í kvöld þegar liðið tapaði á útivelli gegn ecoÖrebro, 101-91, en þegar sömu lið mættust fyrir þremur dögum síðan vann Sundsvall auðveldan sigur, 102-87.

Jakob Örn Sigurðarson skoraði grimmt að vanda eða 18 stig og Hlynur Bæringsson nældi sér í enn eina tvennuna með 13 stigum og 12 fráköstum. Ægir Þór Steinarsson skoraði tvö stig en Ragnar Nathanaelsson kom ekkert við sögu í leiknum.

Eini Íslendingurinn í sigurliði í kvöld var Sigurður Gunnar Þorsteinsson. Hans menn í Solna Vikings bundu enda á fimma leikja taphrinu sína með sigri á Jämtland Basket, 93-87, á heimavelli í kvöld.

Sigurður Gunnar skoraði 15 stig og tók sex fráköst fyrir Solna sem er með 20 stigí sjöunda sæti deildarinnar. Sundsvall er með 34 stig og LF Basket 32 stig.