Norðurljósin teyma ferðamenn í villur

Lögreglan á Selfossi var í gærkvöldi við að aðstoða nokkra erlenda ferðamenn sem höfðu fest bíla sína.

Þetta er orðið nokkuð reglulegur þáttur í starfi lögreglunnar. Oft er fólk að fara um á litlum fólksbílum, og áttar sig ekki á því hversu aðstæður kunna að breytast fljótt, til dæmis á Lyngdalsheiði og í uppsveitum Árnessýlu.

Að sögn lögreglunnar er þetta nokkur breyting á starfi sem verið hefur, fylgir ferðamannastraumi landsins og hversu mjög hann dreifist orðið yfir árið. Lögreglan segir að oft sé um ferðamenn að ræða sem vilja skoða Norðurljósin.