"Þeir lögðu á ráðin um hryðjuverkaárás“

Tveir létust og einn var handtekinn í aðgerðum belgísku lögreglunnar gegn grunuðum hryðjuverkamönnum í bænum Verviers í austurhluta Belgíu fyrr í kvöld. Málið er talið tengjast íslömskum öfgamönnum.

Saksóknarinn Eric van der Sypt greindi fréttamönnum frá því að mennirnir hafi tilheyrt hópi sem hafði snúið aftur frá Sýrlandi og lagt á ráðin um meiriháttar hryðjuverkaárás. Sagði hann hina grunuðu hafa skotið á lögreglu áður en þeir voru drepnir. Engir lögreglumenn særðust í árásinni.

Aðgerðin átti sér stað í miðborg Verviers og segjast vitni hafa heyrt skothríð í nokkrar mínútur og að minnsta kosti þrjár sprengingar. Bærinn Verviers er í Liege-héraði og búa þar um 56 þúsund manns.

Reikna með að handtaka fleiri

Van der Sypt segir að hryðjuverkaárásir mannanna hefðu átt að beinast að lögreglubyggingum. Hann segir ekkert benda til þess að mennirnir hafi tengst mönnunum sem stóðu fyrir hryðjuverkaárásunum í París í síðustu viku.

Lögregla hafði fylgst með ferðum mannanna um margra vikna skeið og beitti lögregla meðal annars hlerunum. „Við reiknum með að handtaka fleiri í tengslum við málið,“ segir saksóknarinn.

Í frétt SVT kemur fram að lögregla í belgísku höfuðborginni Brussel hafi lokað göngum í hverfinu þar sem helstu stofnanir Evrópusambandsins er að finna og að sögn sjónarvotta sveima þyrlur yfir borginni.

Viðbúnaðarstig hækkað

Um tíu samhæfðar aðgerðir lögreglu hafa staðið yfir í Brussel og fleiri stöðum í Belgíu í kvöld og hefur viðbúnaðarstig lögreglu verið hækkað á ákveðnum svæðum í landinu.

Fyrr í dag var belgískur vopnasölumaður handtekinn sem viðurkennt hefur að hafa verið í samskiptum við Amedy Coulibaly, Frakkann sem tók fjölda manns í gíslingu í kosher verslun í austurhluta Parísar á föstudaginn, auk þess að hafa drepið lögreglukonu í frönsku höfuðborginni á fimmtudaginn fyrir viku.