Margra barna mæður: Heimilinu stýrt eins og fyrirtæki

Hjónin Hildur Jónsdóttir og Ragnar Gestsson eiga stærri fjölskyldu en flestir. Þau búa í sex herbergja húsi á Eyrarbakka með börnunum sínum níu. Ragnar er smíðakennari og Hildur heimavinnandi. Heimilinu er stýrt á svipaðan hátt og fyrirtæki og hefur hver og einn fjölskyldumeðlimur sitt ábyrgðahlutverk.

Skipulag skiptir höfuðmáli þegar kemur að fjölskyldulíf þeirra og þegar eitthvað bjátar á er lausn fundin, í sófanum heima, í sameiningu. Hildur og Ragnar segja börnin nær alltaf hafa lausnir á reiðum höndum, yfirleitt bestu lausnirnar.

Börnin skipta hlutverkum sín á milli til að létta á móður sinni. Þeim er skipt niður í þrjá hópa sem svo skipta á milli sín uppvaski, á morgnanna, hádeginu og kvöldin, þar sem ekki er pláss fyrir uppþvottavél á heimilinu.

„Við skiptum niður í vaktir þannig að það þarf ekki að vera erfitt hjá neinum. Ég fór alveg út úr uppvaskinu, nema reyndar í hádeginu en þá er ég með litlu krökkunum,“ segir Hildur en hún var til viðtals í þættinum Margra barna mæður sem sýndur var á Stöð 2 í gær.

Yngsta barnið á heimilinu er fimm mánaða og það elsta tuttugu ára. Ákvörðunin um að stofna svo stóra fjölskyldu var meðvituð og var tekin eftir að þau hjónin hittu þýskan prest og konu hans sem áttu saman tíu börn. Fljótlega eftir það hættu þau að stjórna barneignum sínum og bjóða börnin velkomin þegar þeim hentar að koma.

„Þetta er eins og tilgangurinn í lífinu, ég hef ákveðinn tilgang,“ segir Hildur, en hluta af þættinum má sjá í spilaranum hér fyrir neðan.