Kunstschlager á nýjum stað

„Við erum bara enn að gera þetta fínt, ætlum að hressa aðeins upp á umhverfið og fá hinn sanna Kunstschlager-anda þarna inn, hann er svolítið svona litríkur, frjáls og skemmtilegur,“ segir myndlistarkonan Helga Páley Friðþjófsdóttir, einn af meðlimum listamannarekna gallerísins Kunstschlager, sem opnar Kunstschlager stofu í rými á annarri hæð Hafnarhúss þar sem hópurinn mun starfa til septemberloka 2015.

„Við vorum heimilislaus í tvo mánuði og þetta kom mjög óvænt upp og var óvænt ánægja að fara í Hafnarhúsið. Við viljum vinna sem hópur en við höfum verið að fara út með sýningar að sýna,“ segir hún. Kunstschlager var áður starfrækt á Rauðarárstíg og hélt þar þrjátíu og átta sýningar og hópurinn hefur meðal annars ferðast til Stokkhólms, Finnlands og Hjalteyrar.

Ýmissa nýjunga er að vænta frá hópnum en í rýminu verða sérhönnuð Kunstschlager-húsgögn þar sem gestir geta látið fara vel um sig.

„Það verður svona rúllandi dagskrá þarna, þetta er ekki beint gallerí. Kunstschlager flytur ekki þarna inn, þetta verður svona eins og afdrep eiginlega, fólk getur komið og notið útsýnisins.“ Einnig verður ný heimasíða opnuð á næstunni og hægt verður að fylgjast með Kunstschlager stofunni í vefmyndavél.

„Fólk þarf þá ekki að fara beint á staðinn heldur getur það bara fylgst með á netinu,“ segir hún hlæjandi og bætir við: „Við erum að verða virðulegri og að tæknivæðast.“

Einnig verður boðið upp á veitingar úr lúgu og á svæðinu verður hljóðverksstandur og vídeóklefi.

Að Kunstschlager standa auk Helgu Páleyjar, Guðlaug Mía Eyþórsdóttir, Baldvin Einarsson, Helgi Þórsson, Þórdís Erla Zoëga, Sigmann Þórðarson, Hrönn Gunnarsdóttir, Kristín Karólína Helgadóttir og Þorgerður Þórhallsdóttir, en hópurinn varð til árið 2012. „Þetta er svo mikið samstarfsverkefni á milli okkar sem erum í þessu. Við erum að gera svolítið ólíka hluti og það er skemmtileg tilbreyting. Að vera í þessu gefur manni svo mikið frelsi til þess að prófa ýmsa hluti og gera þá meira spontant.“

Kunstschlager stofa verður opnuð í Hafnarhúsi þann 21. mars næstkomandi, klukkan 16.00.