Framkvæmdastjóri Strætó prufar ferðaþjónustu fatlaðra: „Þarf miklu betra aðgengi“

Ferðaþjónusta fatlaðra var mikið gagnrýnd á árinu sem er að líða. Sendiherrar samnings Sameinuðu þjóðanna um réttindi fatlaðs fólks ákváðu á dögunum að bjóða Jóhannesi Rúnarssyni, framkvæmdastjóra Strætó, í bíltúr í hjólastól. Margrét Erla úr Íslandi í dag fékk að sitja með.

Klakabunkar og færð hafa mikil áhrif á gæði ferðaþjónustunnar á þessum árstíma, til dæmis þegar kemur að því að skorða hjólastóla vel.

„Þetta er búið að vera áhugavert, ég verð að segja það,“ segir Jóhannes um upplifunina. „Þó maður geti aldrei sett sig í spor fólks sem er í hjólastól þá er þetta ekki þægilegasti ferðamátinn. Þá er ég ekki að gagnrýna bílana, aðallega hraðahindranir, svellbunka og fleiri holur í vegakerfinu hjá okkur.“

Var eitthvað sem kom þér sérstaklega mikið á óvart?

„Ég er farinn að finna fyrir þreytuverkjum í baki. Líka kannski það hvað maður finnur fyrir ósléttum í vegakerfinu og líka hvað aðgengið er ekki til fyrirmyndar á stöðum þar sem margir eru samankomnir.“

Jóhannes segist hafa „glósað“ ýmislegt sem betur mætti fara í ferðinni og þurfi að breytast ef strætisvagnakerfið eigi að vera valkostur fyrir fatlaða.

„Það þarf að hafa miklu betra aðgengi,“ segir hann. „Strætóarnir eru búnir rampi, þannig að það er ekki vandamálið. En að komast að honum, jafnvel fyrir fullfrískt fólk í dag, er mjög erfitt.“