Heilluðu samfélagsmiðla snillinginn með Youtube saumaskapnum

Oliver Luckett ætlar sumsé að koma okkur á kortið,“ segir Róbert Elmarsson, einn þríeykisins Inklaw Clothing sem hefur verið að gera það ansi gott undanfarið og kemur til með að færa út kvíarnar í byrjun næsta árs með hjálp þessa nafntogaða samfélagsmiðlasnillings. Auk Róberts eru þeir Guðjón Geir Geirsson og Anton Birkir Sigfússon mennirnir á bak við merkið, allir fæddir á tíunda áratug síðustu aldar í Hafnarfirði, með alls engan bakgrunn í fatahönnun. Liggur leið þessa íslenska herratískufatamerkis til Los Angeles í janúar þar sem stendur til að koma upp aðstöðu til framleiðslu.

„Luckett er náttúrulega einn sá fremsti á sínu sviði í heiminum í dag, og gríðarlega vel tengdur svo þetta verður spennandi,“ segir Róbert. Aðspurður hvernig standi á að þrír ungir Hafnfirðingar sem saumi og hanni föt rati í fangið á slíkum bandarískum stórlaxi segir Róbert það samstarf allt að því tilviljunarkennt.

„Við fréttum af honum á landinu, og hittum hann svo fyrir slysni niðri í bæ. Þá gripum við gæsina og sögðum honum frá okkur, og hvernig við höfðum náð ansi góðum árangri á samfélagsmiðlunum með okkar vöru, og ætli hann hafi ekki bara séð eitthvað í okkur sem hann tengdi við.

Auk þeirrar staðreyndar að Guðjón saumar allar vörurnar, og hann hefur sjálfur tekið upp á að læra að sauma með hjálp YouTube,“ segir Róbert og bendir á að Luckett sé enginn smákarl þegar kemur að stórsigrum á samfélagsmiðlunum en hann ber meðal annars ábyrgð á Selfie-song, sem tröllreið öllu, og rúmlega það, árið 2014. Þá hefur hann komið Disney á kortið á samfélagsmiðlunum og eflaust kannast flestir við herferðina „My Calvins“, fyrir nær­fatalínu Calvin Klein, svo örfá dæmi séu nefnd.

Þá hafa þeir náð samningum við fjölmiðlafulltrúa vestanhafs svo nú er þeim ekkert að vanbúnaði með útrásina. „Við fórum út til Los Angeles fyrr í haust í boði Lucketts, og þar sló hann upp viðburði þar sem áhrifamiklir einstaklingar létu sjá sig og vörumerkið okkar var svolítið kynnt,“ útskýrir Róbert, sem segir nánast fulla vinnu að halda sér niðri á jörðinni og skellir upp úr.

Segir Róbert meginmarkmiðið að heilla Bandaríkjamenn upp úr skónum, en hingað til hafa einmitt þeir, Ástralar og Bretar verið æstastir í Inklow-fötin. „Það sem oft þykir líka merkilegt, er að við auglýsum okkur ekkert nema bara á samfélagsmiðlunum og ég held ég geti sagt að við séum langstærsta fatamerkið á Íslandi á Insta­gram til dæmis, með okkar rúmlega þrjátíu og sex þúsund fylgjendur á Instagram.“

Strákarnir hafa eflst ansi hratt frá því að fyrirtækið var stofnað árið 2013, þá með áttatíu þúsund krónur í start sem þeir höfðu safnað sér í sumarvinnunni það árið.

„Við ákváðum að hjóla í þetta, þar sem við höfðum verið að vinna í tískufataverslunum og höfðum brennandi áhuga á tísku. Okkur fannst þó eitthvað vanta, þar sem allir eru voðalega eins klæddir hérna,“ útskýrir Róbert. Fljótt vatt verkefnið upp á sig og síðan þá hefur greinilega ansi mikið vatn runnið til sjávar, og sífellt birtast fréttir þess efnis að stórstjörnur séu að skarta Inklaw-fatnaði og virðast heimsþekktir íþróttamenn hafa sérlegt dálæti á fötunum.

„Það er svolítið sérstakt en auðvitað gaman, og frábær auglýsing fyrir okkur að sjá menn eins og Robert Lewandowski hjá Bayern München og NBA-leikmanninn Shaun Livingston, sem við sérsaumuðum á, nota fötin okkar,“ segir Róbert að lokum, yfir sig spenntur fyrir komandi tímum.