Ætla að banna óreyndum göngugörpum að fara á Everest

Óreyndir göngumenn munu ekki fá tækifæri til að ganga á Everest, hæsta fjall heims, innan tíðar. Nepölsk stjórnvöld hafa boðað reglur þess efnis í von um að bæta öryggi á fjallinu.

Ferðamálaráðherra landsins vonast til að búið verði að innleiða reglurnar fyrir vorið, þegar hundruð göngugarpa mæta jafnan til Nepal í von um að komast á 8.848 metra háan tindinn.

233 hafa dáið á leiðinni upp eða niður Everest frá árinu 1922 en á síðasta ári létust 16 sjerpar í snjóflóði en átján til viðbótar létust í öðru flóði í grunnbúðum fjallsins síðastliðið vor.