Fyndnasti stúdent Háskóla Íslands verður valinn í kvöld

Úrslitakvöld uppistandskeppninnar Fyndnasti nemi Háskóla Íslands verður haldið í kvöld, fimmtudaginn 16. apríl, kl 21:00 á Stúdentakjallaranum. Þetta er í fyrsta sinn sem að keppnin er haldin en það er Stúdentaráð Háskóla Íslands sem heldur keppnina í samstarfi við Landsbankann og Stúdentakjallarann. Alls tóku 13 nemendur þátt og komust 7 áfram á undankvöldunum sem haldin voru í síðastliðni viku en einu þáttökuskilyrðin voru að vera nemandi við Hí.

Til mikils er að vinna en sá nemandi sem að hlýtur titilinn hlýtur einnig 100.000 krónur í verðlaunafé frá Landsbankanum. Steiney Skúladóttir úr Hraðfréttum verður kynnir ásamt því að dómarar kvöldsins verða Bylgja Babýlons, Daníel Geir Moritz og Logi Bergmann.

„Við vorum himinlifandi með þáttökuna og undankvöldin heppnuðust vonum framar. Það var fullt í öll sæti og meira til á kjallaranum í síðustu viku og það er greinilegt það er til nóg af fyndnum nemum í háskólanum. Við erum mjög spennt fyrir kvöldinu og vonum að þetta verði seinna meir árlegur viðburður á vegum Stúdentaráðs,“ segir Ásrún Birgisdóttir formaður félags- og menningarlífsnefndar SHÍ.

Þeir sem keppa til úrslita í kvöld eru:

Jón Magnús Arnarsson

Eydís Blöndal

Orri Snær Karlsson

Halldóra Kristín Unnarsdóttir

Jóhannes Ingi Torfason

Ingibjörg S. Bergsteinsdóttir

Brynjólfur Jóhann Bjarnason