Chelsea fær væntanlega háa sekt vegna leiksins á Old Trafford

Chelsea á von á hárri sekt frá enska knattspyrnusambandinu vegna framgöngu leikmanna liðsins á móti Manchester United á Old Trafford í gær.

Ástæða sektarinnar eru þessi sjö gulu spjöld og þetta eina rauða spjald sem leikmenn Chelsea fengu í leiknum.

Manchester United jafnaði metin með marki í uppbótartíma leiksins eftir að Branislav Ivanovic fékk bæði á sig aukaspyrnu og sitt annað gula spjald sem var harður dómur.

Phil Dowd, dómari leiksins, var örugglega ekki vinsælasti maðurinn hjá Jose Mourinho, knattspyrnustjóra Chelsea, eftir leikinn en portúgalski stjórinn passaði sig þó á því að segja ekki of mikið en lét það þó ekki fara framhjá neinum hvað hann hugsaði.

Enska knattspyrnusambandið hafði gefið það út að félög fái 25 þúsund punta sekt ef lið þeirra fá sex gul spjöld eða fleiri í einum leik. 25 þúsund pund eru tæplega fimm milljónir íslenskra króna.

Branislav Ivanović, Cesc Fàbregas, Oscar, Nemanja Matić, Eden Hazard og Didier Drogba fengu allir gult spjald í leiknum og sjöunda gula spjaldið sem Ivanović fékk breyttist síðan í rautt.