Franskur spítali í nýju hlutverki

Franski spítalinn á Fáskrúðsfirði, sem reistur var árið 1903 að Búðum og var síðar nýttur sem íbúðarhús á Hafnarnesi, fær fljótlega nýtt hlutverk þegar honum verður breytt í hótel á Fáskrúðsfirði. Spítalinn var einn þriggja spítala sem franska ríkisstjórnin lét reisa hérlendis í upphafi síðustu aldar en þá stunduðu franskir sjómenn veiðar á Íslandsmiðum.

Það er Minjavernd sem hefur haft veg og vanda af framkvæmdunum en Þorsteinn Bergsson, framkvæmdastjóri Minjaverndar, segir félagið hafa verið að skima eftir verkefnum á landsbyggðinni þegar starfsmenn þess hnutu um spítalann þar sem hann stóð í eyði úti á Hafnarnesi.

„Í fyrstu var hugmyndin að ráðast í endurbætur á húsinu þar sem það stóð en fljótlega sáum við að erfitt var að finna not fyrir húsið þar. Því var ákveðið að flytja húsið aftur til Fáskrúðsfjarðar. Upphaflega voru uppi hugmyndir um að setja það á gamla sökkulinn en við fundum betri stað á ónýttri lóð, fyrir neðan Læknishúsið sem Frakkar reistu árið 1907.“

Eftir að veiðar franskra sjómanna lögðust niður var húsið flutt sjóleiðis út á Hafnarnes árið 1939 og nýtt sem íbúðarhús og skóli. Mest bjuggu þar milli 50-60 manns. Frá árinu 1964 hefur húsið hins vegar staðið autt og nær ekkert viðhald fengið.

„Ákvörðun um endurbætur var tekin árið 2008 og síðan þá hefur verkefnið vaxið töluvert. Ekki eingöngu var spítalinn tekinn í gegn heldur einnig Læknishúsið, sjúkraskýlið sem var fyrsta húsið sem Frakkar reistu þar, kapellan frá 1898 og síðan byggðum við eftirmynd af líkhúsinu. Þannig var framkvæmdin orðin stórt verkefni sem skiptir atvinnulífið á Fáskrúðsfirði miklu máli og gerir heilmikið fyrir bæjarbraginn.“

Í sumar mun Fosshótel opna þar þriggja stjörnu hótel en húsið verður tengt við Læknishúsið með göngum. Í hótelinu verða 26 rúmgóð herbergi til að byrja með og veglegur veitingastaður. Í Læknishúsinu og göngunum milli húsanna verður sett upp sýning um frönsku sjómennina, húsin tvö og samskipti þjóðanna undanfarnar aldir.

Stefnt er að því að opna hótelið um mánaðamótin maí-júní en formleg opnun verður 14. júní. Safnið verður opnað á sama tíma en formleg opnun þess, ásamt blessun kapellunnar, verður á Frönskum dögum 26. júlí.